د جرمني په بوخوم ښار کې په یوه آپارتمان کې د اور لګېدنې له امله ۳ کسان مړه او ۵ نور ټپیان شول.
د بوخوم اور وژنې ادارې په خپره شوې خبرپاڼه کې ویلي چې د ځايي وخت په سهار شاوخوا ۴:۱۵ بجو د بوخوم په «پوسټ» واټ کې پر یو آپارتمان د اور لګېدنې په اړه خبر ورکړل شو.
په خبرپاڼه کې راغلي چې په ودانۍ کې ۳ کسان په پېښه کې ځای پر ځای مړه شوي او ۵ ټپیان روغتون ته لېږدول شوي دي.
د بوخوم پولیسو په وینا، د اور لګېدنې د څېړلو لپاره د بوخوم څارنوالۍ تر همغږۍ لاندې یوه ځانګړې کمېټه جوړه شوې ده.
پولیسو تر اوسه د اور لګېدنې د لامل او د مړو شویو کسانو په اړه نور جزییات نه دي خپاره کړي.
