د کرملین لخوا په خپره شوې اعلامیه کې راغلي دي چې، پوتین د دې په بیانولو سره چې په دې خبرو کې یې د انرژۍ په نړیوالو بازارونو کې پر پرمختګونو بحث کړی، وویل: "روسي لوري تایید کړه چې د امریکا او نړۍ بازارونو ته د تېلو او نفتي توکو رسولو ته چمتو دی. زه باور لرم چې دا به پر ټول نړیوال اقتصاد مثبتې اغېزې ولري."

پوتین څرګنده کړه چې په دغو خبرو کې د اوکراین د کړکېچ د حل پر امکاناتو په هر اړخیزه توګه غور وشو، او همدارنګه د ایران پر وضعیت او د دوه اړخیزو اړیکو پر بېلابېلو اړخونو هم بحث وشو.

پوتین پر دې خبرې په ټینګار سره چې دوی د دواړو هېوادونو د مشرانو ترمنځ د مخامخ اړیکو پر دوام موافقه کړې، یادونه وکړه چې د ولسمشرۍ د ادارو، استخباراتي سازمانونو او نورو بنسټونو ترمنځ به همکاري هم دوام ولري.

ټرمپ نن په خپلو څرګندونو کې اعلان وکړ چې له پوتین سره یې هوکړه کړې چې روسیه به امریکا او نړیوالو بازارونو ته په لومړي پړاو کې له ۳۰۰ زره ټنو څخه ډېر، د نومبر په میاشت کې ۵۰۰ زره ټنه اضافي او له هغې وروسته ۱ میلیون ټنه ډیزل تېل برابر کړي.

د امریکا د مالیې وزارت هم خبر ورکړی و چې نړیوالو بازارونو ته د روسیې د ډیزل تېلو د عرضې (وړاندې کولو) د اجازې ورکولو په موخه به یو لنډمهاله عمومي جواز صادر کړي.