په انقره کې د افغانستان سفارت د تورکيې او افغانستان د اړیکو د ۱۰۵مې کلیزې په مناسبت د روژه ماتي پروګرام جوړ کړ.

پدې پروګرام کې په انقره کې د افغانستان سفير صنیع الله فرهمند، عدالت او پراختیا ګوند استازو، د خدا پار ګوند مرستيال مشر اسحاق ساغلام، په انقره کې د بهرنيو ديپلوماتيکو ماموريتونو استازو او د ګڼ شمېر مدني ټولنو مسؤلینو ګډون کړی وو.

سفير فرهمند دلته په خپلو خبرو کې وويل، چې دا پروګرام د افغانستان او تورکيې ترمنځ د تاريخي دوستۍ د ۱۰۵مې کليزې په مناسبت جوړ شوى او زياته يې کړه چې دا دوستي د دواړو ملتونو په تاريخ، کلتور او ورورولۍ کې ژورې ريښې لري.

فرهمند وویل: "افغانستان او تورکیه له یوې پېړۍ څخه ډېر وخت راهیسې یو د بل ترڅنګ ولاړ دي. زموږ اړیکې یوازې پر سیاسي او ډیپلوماټیکو همکاریو نه، بلکې پر متقابل درناوي، باور او د دوو مسلمانو ملتونو ترمنځ د دوستۍ پر پیاوړو اړیکو هم ولاړې دي." نوموړي د تاریخ په بېلابېلو پړاوونو کې له افغانستان سره د تورکیې له ملاتړ او همکاریو مننه وکړه.

فرهمند ټینګار وکړ چې هېواد یې د ثبات او پرمختګ پر لور نوی پړاو پیل کړی دی. نوموړي وویل، د امنیت په برخه کې له کلونو جګړو او بې ثباتۍ وروسته د هېواد په ټولو سیمو کې امنیتي وضعیت د پام وړ ښه شوی او د عادي ژوند او اقتصادي فعالیتونو لپاره غوره شرایط برابر شوي دي.

فرهمند په دې خبرې سره چې همکاري او خبرې اترې په سیمه کې د ننګونو د هواري او د ثبات د ټینګښت لپاره تر ټولو غوره لار ده، وویل: "افغان ولس غواړي د سولې او ثبات په فضا کې ژوند وکړي او د راتلونکو نسلونو لپاره یو ښه راتلونکی جوړ کړي. د افغانستان حکومت د ګاونډي پاکستان په ګډون له هېڅ هېواد سره شخړه نه غواړي. زموږ پالیسي پر سوله، ښه ګاونډيتوب او د خبرو اترو له لارې د ستونزو پر هواري ولاړه ده."

فرهمند وويل، چې وخت په وخت داسې کړنې ترسره کېږي چې کړکېچ او بې ثباتي رامنځته کولى شي، خو ټینګار یې وکړ چې سوله او ثبات د سيمې د ټولو هېوادونو په ګټه دي.

سفير فرهمند له هغو تورکي خيريه او بشري مرستندويه بنسټونو څخه مننه وکړه چې د افغان ولس ترڅنګ ولاړ دي او د کلونو په اوږدو کې يې په بېلابېلو برخو کې مرستې رسولي دي.

په روژه ماتي کې ګډونوالو ته افغاني خواړه وړاندې شول.