اوکراین د مسکو پر ځواکونو تور لګولی چې په قصدي او سیستماتیک ډول پر ملکي وګړو د کوچنیو بې پیلوټه الوتکو (ډرونونو) بریدونه کوي.
چارواکو وویل، د اوکراین په جنوبي ښار خرسون کې پر یوه بس د روسیې د بې پیلوټه الوتکې (ډرون) په برید کې دوه کسان وژل شوي او اوه نور ټپیان شوي دي.
د سیمې والي اولیکساندر پروکودین د شنبې په ورځ په ټیلیګرام کې زیاته کړه، چې د مرګ ژوبلې ډېری قربانیان د عامه خدماتو کارکوونکي وو.
هغه د پېښې له ځایه انځورونه خپاره کړي چې په کې یو بس ښکاري چې کړکۍ یې ماتې شوې دي او یو جسد چې د وینې نښې پرې دي، پر فرش پروت دی.
د اوکراین د بشري حقونو استازي دیمیترو لوبینیتس په ټیلیګرام اپلیکېشن کې وویل: "دا ډول بریدونه د ملکي وګړو پر وړاندې د ترهګرۍ د سیستماتیکې پالیسۍ یوه برخه ده."
خرسون، چې د روسیې د ځواکونو له خوا نیول شوی یوازینی ولایتي مرکز و، په ۲۰۲۲ کال کې د اوکرایني ځواکونو له خوا بېرته ونیول شو، خو په دې وروستیو کې د دنیپرو سیند له بلې غاړې د روسي ځواکونو له خوا تر پرله پسې بریدونو لاندې دی.
اوکرایني چارواکو د مسکو پر ځواکونو تور لګولی چې د جګړې لومړۍ کرښې ته نږدې سیمو، په ځانګړې توګه په خرسون کې، په قصدي او سیستماتیک ډول پر ملکي وګړو د کوچنیو بې پیلوټه الوتکو (ډرونونو) بریدونه کوي.
د سیمې والي اوله کیپر وویل، د اودیسا جنوبي سیمه، چې په تېرو څو میاشتو کې تقریبا هره ورځ د روسیې د بریدونو هدف ګرځېدلې، تېره شپه هم تر برید لاندې راغلې ده.
هغه په ټیلیګرام کې زیاته کړه، چې په یوه بندر کې یوې ګودام او شاوخوا ودانیو ته زیان اوښتی دی.
د اوکراین هوايي ځواکونو ویلي، چې تېره شپه یې د روسیې له خوا د توغول شویو ۱۶۳ لیرې واټن ویشتونکو بې پیلوټه الوتکو (ډرونونو) له ډلې ۱۴۲ یې راغورځولي دي.
