د روسیې دفاع وزارت اعلان وکړ چې د اوکراین په پلازمېنه کیف او د کیف په شاوخوا سیمو کې یې ترانسپورتي، لوجستیکي او د توکو د وېش پر مرکزونو بریدونه کړي دي.
د وزارت له خوا په خپره شوې خبرپاڼه کې په اوکراین کې د روسي وسله والو ځواکونو د فعالیتونو په اړه معلومات ورکړل شوي دي.

په اعلامیه کې راغلي چې روسي پوځ تېره شپه د کیف په ښار او د کیف په سیمه کې پر ترانسپورتي، لوجستیکي او د وېش پر مرکزونو پراخ بریدونه ترسره کړي دي. په دې بریدونو کې "MLP-Chayka"، "Trans-Logistics" او "Epitsentr" لوجستیکي مرکزونه او د "Nova Poshta" ټرمینل ویشتل شوي دي. ویل کیږي چې په دغو ځایونو کې د بې پیلوټه الوتکو پرزې، روبوټیک سیسټمونه او د الکترونیکي جګړې وسایل ساتل کېدل او وېشل کېدل.

همدارنګه په اعلامیه کې زیاته شوې چې د کیف په سیمه کې د "Terminal Brovary"، "Raben Ukraine" او "Brovary" په نومونو لوجستیکي مرکزونه هم په نښه شوي، چې د ډرون الوتکو د پرزو د زېرمه کولو او لېږدولو لپاره کارول کېدل.

د روسیې دفاع وزارت دغه راز ویلي چې د اودیسا ښار په سویل کې په سمندر کې د نظامي بارونو ۳ کښتۍ هم ویشتل شوې دي. په دې عملیاتو کې له ځمکې څخه ویشتونکو دقیقو وسلو او د لیرې واټن ویشتونکو بې پیلوټه الوتکو څخه کار اخیستل شوی دی.