"امریکايي پوځ پر ایران بریدونه کړي دي؛ دا بریدونه وروسته له هغه وشول چې د امریکا په وینا، ایران په منځني ختیځ کې پر امریکايي ځواکونو د بریدونو هڅه کړې وه.
د امریکا مرکزي قوماندانۍ (سنتکام) ویلي چې تېره شپه یې د ایران د سپاه پاسداران ځواکونو اړوند په لسګونو مرکزونه په نښه کړي دي.
په دغو بریدونو کې په ټول ایران کې پوځي قوماندانۍ، د توغندیو او ډرون الوتکو مرکزونه، ساحلي څارنې او دفاعي سایټونه او سمندري وړتیاوې په نښه شوې دي.
سنتکام ویلي چې د دې عملیاتو هدف د ایران او د هغه د متحدو ډلو له خوا امریکايي ځواکونو، سوداګریزو کښتیو او د خلیج هېوادونو ته د متوجه ګواښونو کمول دي."
فیدان په انقره کې د حماس له نوي سیاسي مشر خلیل الحیه سره وکتل
"د تورکیې د بهرنیو چارو وزیر هاکان فیدان په انقره کې د حماس د سیاسي دفتر له نوي ټاکل شوي مشر خلیل الحیه او د حماس له یو پلاوي سره لیده وکړه.
د تورکیې د بهرنیو چارو وزارت د سرچینو په وینا، فیدان الحیه ته د هغه د نوي مسؤلیت له امله مبارکي ورکړه.
الحیه فیدان ته په غزه او اشغال شوې لوېدیځه غاړه کې د روان وضعیت په اړه معلومات ورکړل.
هغه وویل چې د اسرائیل حکومت په اشغال شوي ختیځ بیت المقدس کې د میشت ځایونو جوړول او پر مقدسو ځایونو بریدونه نور هم شدید کړي دي."
د غزې په یوه کمپ کې د اسرائیلو په بریدونو کې درې تنه ووژل شول او یو استوګنیز بلاک وویشتل شو
"د روغتیايي کارکوونکو په وینا، د اسرائیلو په تازه بریدونو کې ۳ فلسطینیان وژل شوي او ۲۷ نور ټپیان شوي دي، چې دا د اوربند د سرغړونې وروستي راپورونه دي.
د غزې ښار لوېدیځ ته د 'شاطي' په کډوالو کمپ کې د اسرائیلي الوتکو لخوا پر یوې استوګنې ودانۍ برید وشو چې له امله یې ۷ کسان ټپیان شول.
د الشفا روغتون چارواکو ویلي چې د ټپیانو روغتیایي حالت د اندېښنې وړ دی.
اوسېدونکي وايي چې پر دغې څو پوړیزې ودانۍ له برید وړاندې دوی ته د اسرائیلي استخباراتو لخوا د ودانۍ خالي کولو خبرداری ورکړل شوی و.
دا ودانۍ په بشپړه توګه ویجاړه شوې، نږدې کورونو ته زیان رسېدلی او په سیمه کې اور لګېدلی و چې بیا د ملکي دفاع ډلو لخوا کنټرول شو."
د پاکستان په شمال کې پر یوې امنیتي پوستې په برید کې ۷ پولیس وژل شوي
"د سیمه ییزو رسنیو د راپورونو له مخې، د پاکستان په شمال کې پر یوې امنیتي پوستې په برید کې لږ تر لږه ۷ پولیس او ۸ ترهګر وژل شوي دي.
دا برید د چهارشنبې په ماښام د خیبر پښتونخوا ایالت په هنګو ولسوالۍ کې شوی دی.
پولیسو ویلي چې په پېښه کې ۲۲ نور سرتېري ټپیان دي، چې د ځینو حالت یې نازک ښودل شوی دی. امنیتي ځواکونو په سیمه کې چاڼیز عملیات پیل کړي دي. تر اوسه کومې ډلې د دې برید مسؤلیت نه دی منلی."
د امریکا فدرالي مرکزي بانک د انفلاسیون د دوام له امله د سود نرخ ثابت وساتل
"د امریکا فدرالي (مرکزي بانک) د پرله پسې پنځمې ناستې لپاره د سود نرخونه بدل نه کړل او ثابت یې وساتل.
د سود بنسټیزه کچه د ۳.۵۰ او ۳.۷۵ سلنې ترمنځ پاتې شوه.
دا پرېکړه داسې مهال کېږي چې د ایران پر وړاندې د امریکا د جګړې له امله انفلاسیون (بیه لوړېدل) مخ په زیاتېدو دی.
د فدرالي مرکزي بانک له ۱۲ پالیسي جوړونکو څخه ۳ تنو یې د سود د نرخ د یو پر څلورمه برخې لوړولو په ګټه رایه ورکړه.
د فدرالي مرکزي بانک مشر 'کیون وارش' وویل چې مرکزي بانک د انفلاسیون پر کنټرول تمرکز کوي، خو خبرداری یې ورکړ چې د قیمتونو د ژر راټیټولو لپاره کومه 'جادویي لښته' نشته.
هغه زیاته کړه چې د امریکا اقتصاد د وروستیو ټکانونو سره سره بیا هم مقاومت او ثبات ښودلی دی."
