د داعش ترهګرې ډلې سیمه ییزې څانګې په یوه برید کې د بدخشان د اطلاعاتو او کلتور د رئیس ذبیح الله امیري د وژلو خبر ورکړی؛ بل لور ته طالبانو ټینګار کړی چې دا ډول بریدونه به د دوی پر امنیتي هڅو منفي اغېز ونه کړي.

د 'سایټ' (SITE) استخباراتي ډلې د راپور له مخې، د داعش ترهګرې ډلې سیمه ییزې څانګې د افغانستان په شمال ختیځ کې پر یوه طالب چارواکي د شوي وژونکي برید مسؤلیت منلی دی.

د بدخشان د اطلاعاتو او کلتور رئیس ذبیح الله امیري د سې شنبې په ورځ د دغه ولایت مرکز فیض اباد ته پر لاره په ډزو ووژل شو. د داعش-خراسان ډلې، چې په افغانستان او پاکستان کې د دغې ډلې څانګه ده، د چهارشنبې په ورځ اعلان وکړ چې دا برید دوی ترسره کړی دی.

امیري د هلمند د والي امان الدین منصور وراره و. د افغانستان د اطلاعاتو او کلتور وزارت ویلي چې له دغه "بزدلانه برید" وروسته یو بریدګر وژل شوی او بل یې ژوندی نیول شوی دی.

یاد وزارت په خپله اعلامیه کې ویلي: "موږ د حکومت دښمنانو ته یادونه کوو چې دا ډول بزدلانه کړنې به هیڅکله زموږ کلک هوډ او نه متزلزل کېدونکې پرېکړې کمزورې نه کړي."

که څه هم طالب چارواکو په افغانستان کې د امنیت د ټینګښت ژمنه کړې، خو په ۲۰۲۱ کال کې واک ته د دوی له رسېدو راهیسې وخت ناوخت بریدونه دوام لري.

د داعش ډلې تر دې وړاندې هم د ځینو خونړیو بریدونو مسؤلیت منلی، چې په هغې کې د جنوري په میاشت کې د کابل په مرکز کې پر یوه چینايي رستورانت برید هم شامل و چې لږ تر لږه ۷ کسان پکې ووژل شول. دغې ډلې همداراز د ۲۰۲۴ کال په ډسمبر کې په کابل کې د کډوالو او راستنېدونکو چارو د وزیر خلیل الرحمن حقاني د وژل کېدو د ځانمرګي برید مسؤلیت هم په غاړه اخیستی و.