اټکل کېږي چې په ۲۰۲۶ کال کې د اوکراین د دفاعي صنایعو د ملاتړ په موخه ټولټال ۲۸.۳ میلیارده یورو وکارول شي.
اروپایي ټولنې د اوکراین د بېړنیو پوځي اړتیاوو د پوره کولو لپاره ۳.۴۷ میلیارده یورو نوې مالي مرسته ځانګړې کړې ده.
د اروپایي کمیسیون لخوا په خپره شوې اعلامیه کې راغلي چې دا پیسې اوکراین ته د ۹۰ میلیارده یورو په ارزښت د "اوکراین د ملاتړ پور" پروګرام د دفاعي برخې په چوکاټ کې ورکړل شوې دي.
په اعلامیه کې اشاره شوې چې دغه بودیجه د روسیې پر وړاندې د اوکراین د دفاع لپاره د بېړنیو پوځي اړتیاوو په غبرګون کې ورکول کېږي. دغه ۳.۴۷ میلیارده یورو به د بې پیلوټه الوتکو (ډرون)، د جټ انجن لرونکو لیرې واټن ویشتونکو ډرونونو، توغندیو، د هوايي دفاعي سیسټمونو او د 'ګریپن' جنګي الوتکو په چمتو کولو کې وکارول شي.
په اعلامیه کې دا هم ویل شوي چې اوکراین ته په چټکۍ سره د دفاعي تجهیزاتو د رسولو په موخه، په راتلونکو اونیو کې به د ډرونونو، مهماتو، هوايي دفاعي سیسټمونو او توغندیو لپاره نورې مالي مرستې هم تایید شي.
د اروپایي ټولنې د "اوکراین د ملاتړ پور" پروګرام ټولټال ۹۰ میلیارده یورو مالي مرسته په بر کې نیسي، چې ۶۰ میلیارده یې د اوکراین د دفاعي وړتیا او صنایعو د پیاوړتیا او ۳۰ میلیارده یې د دولتي چارو او بنسټیزو عامه خدمتونو د دوام لپاره ځانګړې شوې دي.
د دغه پروګرام له مخې، تمه ده چې په ۲۰۲۶ کال کې د اوکراین د دفاعي صنایعو د ملاتړ په موخه ټولټال ۲۸.۳ میلیارده یورو وکارول شي.
