د سي ان ان په هغه راپور کې چې د دوو امریکایي چارواکو په حواله ورکړل شوی او نومونه یې نه دي په ډاګه شوي، ویل شوي چې امریکا پر ایران د لویو بریدونو پلانونه لري او که ټرمپ پرېکړه وکړي، کولای شي په ۹۶ ساعتونو کې دغه بریدونه پیل کړي.
په راپور کې ټینګار شوی چې په سیمه کې د احتمالي بریدونو لپاره کافي ځواکونه شتون لري او دا ادعا هم شوې چې د امریکا د نویو بریدونو پراخوالی ښايي د اوسني وضعیت د ساتلو له هڅو څخه هم واوړي.
په راپور کې ویل شوي چې ځینو اوسنیو او پخوانیو امریکایي چارواکو اټکل کړی چې د برید په اړه د ټرمپ امر ښايي د کال تر پایه په هر وخت کې صادر شي، خو زیات احتمال شته چې دا کار به له منځمهاله ټاکنو وروسته ترسره شي.
په راپور کې د چارواکو دا نظر هم وړاندې شوی چې ټرمپ تر اوسه پرېکړه نه ده کړې چې له منځمهاله ټاکنو وروسته به څه کوي، خو "داسې ښکاري چې د یوه لوی اقدام د امر ورکولو ته لېواله دی." خو په ورته وخت کې یادو چارواکو دا هم وریاده کړې چې ټرمپ په تېر کې هم ځینو اقداماتو ته لېواله ښکارېده، مګر په وروستۍ شېبه کې یې شا تګ کړی (له خپلې پرېکړې په شا شوی) دی.
