دې پېښې د هغو بریدونو د لړۍ په اړه اندېښنې یو ځل بیا راپورته کړي، چې د اسرائیلي مېشتو او سرتېرو له خوا د مسیحي روحانیونو او بنسټونو د په نښه کولو لپاره ترسره کیږي.
د فرانسې کاتولیکې خیریه موسسې 'L'Oeuvre d'Orient' ویلي دي چې اسرائیلي ځواکونو د لبنان په جنوب کې د سالواتورین خویندو اړوند یوه صومعه ویجاړه کړې ده، چې یوه یوناني-کاتولیکه مذهبي ډله ده.
دې خیریه موسسې "د عبادت پر یوه ځای قصدي برید" په کلکه غندلی او پر اسرائیل یې تور لګولی چې د لبنان په جنوب کې په سیستماتیک ډول کورونه نړوي ترڅو د بېځایه شویو ملکي وګړو د بېرته راستنېدو مخه ونیسي.
د اسرائیل پوځ هم ویلي چې د یارون په کلي کې یې فعالو ځواکونو د یوې مذهبي محوطې دننه یوې ودانۍ ته زیان رسولی دی.
د پوځ ویاند، ډګروال اویخای ادرعي، د شنبې په ورځ پر 'اېکس' ټولنیزه شبکه ولیکل: "دا معلومه شوه چې د ترهګریزو زیربناوو د له منځه وړلو لپاره د ځواکونو د عملیاتو پر مهال، په یوه مذهبي محوطه کې یو کور زیانمن شوی دی."
هغه زیاته کړه: "هیڅ داسې ښکاره نښې نه وې چې دا یوه مذهبي ودانۍ ده."
"کله چې په محوطه کې پر یوې بلې ودانۍ واضح پېژندل کېدونکې نښانې ولیدل شوې، ځواکونو اقدام وکړ ترڅو محوطې ته د نور زیان مخه ونیسي."
پر مذهبي ځایونو بریدونه
دا پېښه څو ورځې وروسته له هغه کېږي چې پوځ د لبنان په جنوب کې اسرائیل ته نږدې پوله کې د 'دبل' په نوم مسیحي کلي کې د عیسی علیه السلام د یوې مجسمې د سپکاوي له امله دوه سرتېري د ۳۰ ورځو لپاره بندیان کړل.
یو انځور چې پر ټولنیزو رسنیو خپور شو، یو سرتېری ښيي چې په یوه لوی څټک د مجسمې پر سر ګوزار کوي.
اسرائیل د اپرېل د ۱۷مې له اوربند سره سره پر لبنان خپلو مرګونو بریدونو ته دوام ورکړی، چې دغه اوربند هڅه کوله پر لبنان له شپږو اونیو زیاته جګړه ودروي.
د اوربند متن اسرائیل ته حق ورکوي چې د "پلان شویو، نږدې یا روانو بریدونو" پر وړاندې اقدام وکړي.
اسرائیلي سرتېري د "ژیړ کرښې" په نوم سیمه کې دننه عملیات کوي چې د لبنان له پولې شاوخوا ۱۰ کیلومتره دننه غځېدلې ده، چېرته چې دوی د ودانیو په پراخه کچه چاودنې او نړول ترسره کوي.
