امریکا د ( ډي )  ګروپ د مشرې په توګه بل پړاو ته لار وموندله او ټاکل شوې چې د ۳۲ غوره لوبډلو په پړاو کې له بوسنیا او هرزګوینا سره لوبه وکړي.

تورکیې د ۲۰۲۶ کال د فیفا نړیوال جام د "ډي" (Group D) ګروپ په وروستۍ لوبه کې د امریکا د لاس انجلس په لوبغالي کې کوربه هیواد (امریکا متحده ایالاتو) ته په ماتې ورکولو سره حیرانوونکې لوبه نندارې ته وړاندې کړه.

امریکا لوبه په ډیر سرعت سره پیل کړه او د لوبې په ۳یمه دقیقه کې اسټن ټرسټي وتوانید چې د تورکیې په مقابل کې خپل لومړنی ګول ووهي.

د تورکیې لخوا مساوي کوونکی ګول ډیر ژر ووهل شو. باریش الپر یلماز د امریکا دفاعي کرښه ماته کړه او توپ یې د ریال مادرید ځوان ستوري، اردا ګولر، ته ورساوه؛ ګولر په ۱۰مه دقیقه کې په یو قوي شوټ سره په نړیوال جام کې د ځان او خپلې لوبډلې لومړی ګول وواهه. دا په تیرو ۲۴ کلونو کې (د ۲۰۰۲ کال وروسته) په نړیوال جام کې د تورکیې لومړی ګول و.

تورکیې خپلې حملې جاري وساتلې او په ۳۱مه دقیقه کې د اورکون کوکچو په واسطه دویم ګول هم وواهه او په لومړۍ نیمایي کې ۲-۱ مخکې شوه.

له نږدې واټن څخه ګول
د دویمې نیمایي په پیل کې، امریکا متحده ایالاتو په ۴۹مه دقیقه کې لوبه مساوي کړه. کله چې ترکي مدافعین د توپ په لیرې کولو کې پاتې راغلل، سباسټین برهالټر له چانس څخه ګټه پورته کړه او خپل لومړی نړیوال ګول یې وواهه.

خو کله چې لوبه پای ته نږدې وه، د لوبې په اضافي وخت (۹۰+۸ دقیقه) کې کان ایهان له نږدې واټن څخه د تورکیې لپاره دریم ګول وواهه او په دې ټورنمنټ کې یې د خپلې لوبډلې لومړنۍ او یوازینۍ بریا خپله کړه.

د تورکیې روزونکي، وینچینزو مونټیلا، د لوبې وروسته وویل چې لوبغاړو یې له سیالیو د وتلو د ذهني فشار او د امریکا د مینه والو د شور سره سره، خپله وړتیا او شخصیت وښود. هغه زیاته کړه: "موږ کولی شو په لوړ سر کور ته ستانه شو."

د دې لوبې په پایله کې، متحده ایالات د "ډي" ګروپ په لومړي مقام کې پاتې شول او بل پړاو ته یې لاره پیدا کړه، خو تورکیه په وروستي مقام کې پاتې شوه او له نړیوال جام څخه بهر شوه. امریکا به په راتلونکي پړاو کې له بوسنیا او هرزګوینا سره مخامخ شي.