په پاکستان کې د یوه مسافر وړونکي اورګاډي له پټلۍ څخه د وتلو په پایله کې ۵ کسانو خپل ژوند له لاسه ورکړی او ۳۰ نور ټپیان شوي دي.
د ډان ورځپاڼې د راپور له مخې، هغه مسافر وړونکی اورګاډی چې د پیښور ښار پر لور روان و، د ملتان سیمې سټیشن ته څېرمه د یوه نامعلوم دلیل له امله له پټلۍ څخه ووت.
د پاکستان د اورګاډي ادارې ویاند یادې ورځپاڼې ته په خپلو څرګندونو کې وویل چې په دې پېښه کې ۵ کسان مړه شوي او تر ۳۰ ډېر کسان ټپیان شوي دي.
د اورګاډي چلوونکي رضوان عباس بیا وویل چې مسافر وړونکی اورګاډی په یوه ساعت کې په ۱۰۰ کیلومتره سرعت سره روان و.
د جیو نیوز ټلویزیون د راپور له مخې، د ژغورنې ډلو خبر ورکړی چې له ۱۳ واګونونو څخه مسافرین ایستل شوي، خو په یوه واګون کې لا هم د ژغورنې چارې روانې دي.
د پاکستان لومړي وزیر شهباز شریف د ټپي شویو مسافرینو پر وضعیت د اندیښنې په څرګندولو سره لارښوونه وکړه چې د ژغورنې چارې دې ګړندۍ شي او پرته له ځنډه دې ټپیانو ته اړینې طبي مرستې ورسول شي.
په هیواد کې د تېر یوه کال په اوږدو کې د اورګاډو د پېښو لړۍ، د پاکستان د اورګاډي ادارې لخوا د اورګاډو او پټلیو د ساتنې په برخه کې د غفلت او جوړښتي ستونزو په اړه اندېښنې زیاتې کړې دي.
