د متحده ایالاتو د دفاع وزیر پیټ هیګسټ د امریکایي ځواکونو لپاره د اضافي سرچینو پر اړتیا ټینګار وکړ او اعلان یې وکړ چې له ایران سره د روانې جګړې لګښت "۳۷.۵ میلیارده ډالرو ته رسېدلی دی."

پیټ هیګسټ د لوی درستیز ډان کین او د کرنې وزیرې بروک رولینز سره یوځای د متحده ایالاتو د سنا مجلس د تخصیصاتو کمیټې (د غړو پوښتنو ته د دفاع وزارت (پنټاګون) لپاره د غوښتل شوې اضافي بودیجې په اړه ځوابونه وویل.

هیګسټ وویل: "لکه څنګه چې پوهېږئ، موږ په یوه خطرناکه نړۍ کې ژوند کوو چې زړور او چټکو ګامونو ته اړتیا لري. د ۲۰۲۶ مالي کال لپاره د دې اضافي بودیجې د غوښتنې لامل هم همدا دی." هغه دا غوښتنه د دفاع وزارت د "بېړنیو اړتیاوو د پوره کولو لپاره یو حیاتي او بېړنی اقدام" وباله.

نوموړي وویل چې دا مالي غوښتنه د شته سرچینو بدیل نه دی او زیاته یې کړه: "موږ په یوه جلا دوره کې یو. که موږ همدا اوس په ټیکنالوژۍ، مصنوعي ځیرکتیا  (AI)، خودمختاره سیسټمونو او فضا په برخو کې مهمې پانګونې ونه کړو، نو د بې تفاوتۍ لګښت به ډېر لوړ وي. زموږ مخالفین چې لا دمخه یې دا ډول پانګونې پیل کړي، ښايي له موږ څخه مخکې شي."

د دفاع وزیر د دیموکرات سناتور ډیک ډربین د هغې پوښتنې په ځواب کې چې د فبرورۍ په ۲۸مه د پیل شوې جګړې د لګښت په اړه وه، وویل: "تر نن ورځې پورې ۳۷ میلیارده او ۵۰۰ میلیونه ډالره."

هیګسټ وویل که دا فنډونه برابر نشي، ښايي د سرتېرو معاشونه ونه تادیه شي او د امریکا اردو به د "تجهیزاتو او مهماتو په چټک بیا رغونه او د حیاتي عملیاتو په دوام کې" له جدي ننګونو سره مخ شي.

د هیګسټ پرانیستونکې وینا ۴ ځله د اعتراضونو له امله ودرول شوه:
په هغه ناسته کې چې د ډونالډ ټرمپ د ادارې پر اضافي بودیجې تمرکز درلود، د جګړې ضد فعالانو د هیګسټ وینا ګډوډه کړه. هغه لا خپله لومړۍ جمله نه وه بشپړه کړې چې د معترضینو له خوا پرې نیوکې وشوې او په لنډو وقفو کې ۴ ځله د خبرو کولو څخه منع شو.

کله چې معترضین په چټکۍ سره له تالاره ایستل کېدل، د هغوی دا غږونه اورېدل کېدل: "پر بې ګناه ماشومانو بمباري بنده کړئ."