د تورکیې مهم دفاعي صنعت شرکت اسلسان د امنیت په بدلیدونکي چاپېریال کې د پیاوړي رول لوبولو لپاره د برېښنايي جګړې او ډرون ضد راتلونکي نسل حل لارې وړاندې کوي.
د تورکیې ستر دفاعي شرکت اسلسان، په استانبول کې د SAHA 2026 دفاعي او هوافضایي نندارتون پر مهال په یوه لوړپوړي پروګرام کې د برېښنايي جګړې او ډرون ضد ټکنالوژیو نوې ټولګه معرفي کړه.
دا پرمختللي سیسټمونه د دې لپاره ډیزاین شوي چې په مخ پر زیاتیدونکي بې ثباته عملیاتي چاپیریال کې کار وکړي او په ورته وخت کې د تورکیې "فولادي ډال" یا فولادي ګمبد د هېواد څو اړخیزه او یوځای شوې هوايي دفاعي شبکه د پام وړ پیاوړې کړي.
د اسلسان شرکت رئیس او اجراییوي مشر احمد اق یول وویل: "د جګړې عصري ډګرونه د الکترومقناطیسي طیف او فزیکي برخو ترمنځ بې ساري یووالي ته اړتیا لري. موږ په SAHA 2026 کې ویاړو چې د نوي نسل سیسټمونه وړاندې کوو چې په ځانګړې توګه د فولادي ډال د پیاوړتیا لپاره جوړ شوي دي."
هغه زیاته کړه چې دا سیسټمونه د نامتقارن هوايي ګواښونو د بدلیدونکي وضعیت سره د مقابلې لپاره په لویه کچه تولید ته داخلیږي.
برېښنايي جګړه یوه پوځي اصطلاح ده چې د الکترومقناطیسي طیف — لکه راډیويي څپې، انفرارېډ او رادار — کارول تشریح کوي، ترڅو د دښمن برېښنايي وړتیاوې ګډوډې یا وغولوي او په ورته وخت کې خپل سیسټمونه له ورته مداخلې څخه وساتي.
اق یول د دې نندارتون د ستراتیژیک اهمیت په اړه د تبصرې پر مهال، د ځمکني کورال (Koral) سیسټم د رادار ګډوډولو وړتیا، د اېلګار (Ilgar) د مخابراتي اړیکو د ګډوډولو وړتیا او د ګوک الپ (Gokalp) د ډرون پر وړاندې د ډرون مخنیوي مخکښ نوښت ته اشاره وکړه.
هغه زیاته کړه: " موږ ډاډ ترلاسه کوو چې فولادي ډال د راتلونکي د خورا پېچلو هوايي او برېښنايي ګواښونو پر وړاندې یو نه ماتېدونکی ډال پاتې شي."
په برېښنايي جګړه کې نوی پړاو
د برېښنايي جګړې دا ټولګه، چې د کورال، اېلګار او اېژدرها (Ejderha) وروستۍ نسخې لري، د څو اړخیزو ګواښونو په خنثی کولو کې یو لوی ګام دی. دا سیسټمونه یوازې ګډوډونکي نه دي؛ بلکې دا یوځای شوې شتمنۍ دي چې په بشپړ ډول د وضعیت د پوهاوي لپاره ډیزاین شوي دي.
کورال په ځانګړې توګه د لومړني خبرداري او فعالې خنثی کولو ترمنځ تشه ډکوي. دا سیسټم په یوه ځمکنۍ واحد کې د خورا دقیق برېښنايي ملاتړ او پرېکنده برېښنايي برید په ترسره کولو سره یو نه ماتېدونکی ډیجیټل خنډ رامنځته کوي. دا د لاسرسي ضد/سیمې د کنټرول وړتیا د فولادي ډال ملا تیر دی، چې ډاډ ورکوي چې د دښمن الوتکې او توغول شوي توغندي مخکې له دې چې خپلواکې هوايي حریم ته ګواښ پېښ کړي، پېژندل کیږي او ځپل کیږي.
د اېلګار سیسټم په اړه باید وویل شي، چې اسلسان د دې سیسټم وروستۍ نسخه هم نندارې ته وړاندې کړه، کوم چې د راتلونکي نسل ګرځنده برېښنايي برید سیسټم دی چې د دښمن د مخابراتي شبکو د له منځه وړلو لپاره جوړ شوی دی.
هغه څه چې اېلګار له نورو بېلوي، د هغه د لوړ شدت راډیویي فریکونسي تولید او فعال ګډوډول دي—یوه پېچلې ټکنالوژي چې دا سیسټم ته وړتیا ورکوي ترڅو په ریښتیني وخت کې هغه پیچلي سیسټمونه تعقیب او خنثی کړي چې په چټکۍ سره فریکونسي بدلوي.
د نامتقارن ګواښونو سره مقابله
لکه څنګه چې د ګواښونو بڼه د خپلواکو او کم لګښته هوايي ګواښونو خوا ته بدلیږي، اسلسان د راتلونکي نسل اېژدرها (Ejderha) سره خپل الکترومقناطیسي واک د ډرون ضد (C-UAV) ډګر ته غځولی دی.
دا د لوړ ځواک مایکرووېو وسلو سیسټم په نامتقارن جګړه کې یو لوی بدلون دی، چې په ځانګړې توګه د کوچنیو او خورا کوچنیو ډرونونو د خنثی کولو لپاره جوړ شوی، مخکې له دې چې هغوی خپلو اهدافو ته ورسیږي.
د دودیز فزیکي مخنیوي پر خلاف، اېژدرها د لوړ ځواک الکترومقناطیسي څپو ټکنالوژي کاروي ترڅو د را روانو ډرونونو برېښنايي سرکټونه له کاره وغورځوي او په هوا کې یې بې کاره کړي.
اسلسان د نامتقارن ډرون جګړې په پړاو کې، د ګوکالپ (Gokalp) او مېګفر (Migfer) په معرفي کولو سره د مخنیوي راتلونکي پړاو ته لاره هواروي — دا دوه بېلابېل حلونه په ځانګړې توګه د FPV او کامیکازي (ځانمرګو) ډرونونو د مرګوني ګواښ سره د مقابلې لپاره جوړ شوي دي.
ګوکالپ، د مصنوعي ځیرکتیا پر بنسټ یو چټک مخنیوی کوونکی دی چې د ډرون پر وړاندې د ډرون د خورا دقیقې ښکېلتیا لپاره ډیزاین شوی دی.
په ځمکه کې، د مېګفر د ځان ساتنې FPV مخنیوي سیسټم د لومړۍ کرښې واحدونو لپاره یو مهم "مستقیم فزیکي ګوزار" ډال وړاندې کوي.
د خپل جامع ډرون ضد سیسټم د بشپړولو لپاره، اسلسان د ګوکبرک (Gokberk) وروستۍ نسخه هم پرانیسته — دا د ۱۰ کیلوواټه مستقیمې انرژۍ وسلو سیسټم دی چې په دقیقې هوايي دفاع کې یو نوی پړاو پیلوي.
دا سیسټم د مستقیمې انرژۍ په کارولو سره، په حقیقت کې یو "نه ختمېدونکی شاجور" وړاندې کوي، چې د دودیزو فزیکي مخنیوی کوونکو پورې اړوند لوژستیک او لګښتونه له منځه وړي.
