د روسیې د بهرنیو چارو وزارت ویاندې ماریا زاخارووا وویل چې ناټو او اروپایي ټولنه اوس د نړیوال تروریزم په یوه برخه بدل شوي دي.
ماریا زاخارووا د روسیې "تاس" خبري اژانس ته په خپلو خبرو کې، د اوکراین له خوا د کراسنودار په سیمه کې پر یوې ساحل باندې برید وڅېړه.
زاخارووا وویل: "د اروپا په مرکز کې، یوه ترهګره ډله چې په اوکراین کې یې واک غصب کړی، فعالیت کوي. د ناټو هېوادونه د تروریزم مالي ملاتړ کوي. څه موده وړاندې ناټو او اروپایي ټولنې د تروریزم په وړاندې د 'صفر زغم' سیاست اعلان کړی و، خو اوس دوی په خپله د نړیوال تروریزم برخه ګرځېدلي دي."
راپورونه ښیي چې تېره ورځ د اوکراین پوځ د کراسنودار پر سیمه د بې پیلوټه الوتکو (ډرون) برید کړی، چې په پایله کې یې د ګلینجیک ښار ته نږدې په "ارخیپو-اوسیپوفکا" کلي کې پر یوې ساحل باندې ۸ کسان وژل شوي او ۵۸ نور ټپیان شوي دي.
