تورکیې، سعودي عربستان او پاکستان د دوشنبې پر ورځ پرېکړه وکړه چې خپل ګډ دفاعي چوکاټ نور هم پیاوړی کړي. دا پرېکړه په ریاض کې د «د ګډې دفاع مکې تړون» تر چتر لاندې د جوړې شوې اساسي، سیاسی او دفاعي کمیټې په بیړنۍ غونډه کې د لوړپوړو سیاسی او پوځي چارواکو ترمنځ ونیول شوه.

دا بېړنۍ غونډه پر سعودي عربستان د حوثي یاغیانو د نویو بریدونو د زیاتېدو او د سیمه‌ییز امنیت په اړه د مخ په زیاتېدونکو اندېښنو له امله ترسره شوه.

د تورکیې د بهرنیو چارو وزیر خاقان فیدان  وویل چې دغو درېیو هېوادونو د سعودي عربستان د دفاعي ظرفیت د پیاوړتیا لپاره د ګامونو پورته کولو ترڅنګ، د ډیپلوماسۍ او خبرو اترو له لارې د سیمه‌ییزو مسایلو د سوله ایز حل پر لارو چارو هر اړخیز بحث وکړ.

په اشغال شوې لوېدیځه غاړه کې د اسرائیلي ځواکونو او غصب کوونکو په بریدونو کې لږ تر لږه ۸ فلسطینیان ټپیان شول

د فلسطین رسمي سرچینو تایید کړې چې په اشغال شوې لوېدیځه غاړه کې د غیرقانوني اسرائیلي غصب کوونکو او پوځي ځواکونو د بریدونو په نوي بهیر کې لږ تر لږه اته تنه فلسطینیان ټپیان شوي دي.

تېري کوونکو ځایي اوسېدونکي د ښځو او ماشومانو په ګډون  په فزیکي توګه ځورولي او وهلي او د هغوی وسایط یې تخریب کړي دي؛ په داسې حال کې چې غصب کوونکو او ملګرو اسرائیلي ځواکونو یې یو شمېر هستوګنیز کورونه او د مالدارۍ فارمونه سوځولي دي.

د فلسطین رسمي خبري اژانس (وفا/Wafa) د راپور له مخې، د لوېدیځې غاړې په شمال کې د قلقيلية ولایت اړوند د «عَمّاتين» په کلي کې وروسته له هغې ۴ تنه فلسطینیان سخت ټپیان شول چې غیرقانوني غصب کوونکو پر هغوی د لرګیو او ډبرو بریدونه وکړل.

یمني ځواکونو باب المندب ته نږدې ستراتیژیکې سیمې تر خپل کنټرول لاندې راوستې

د یمن پوځ وویل چې دولتي ځواکونو له حوثیانو سره له شدیدو نښتو وروسته د «ذباب» ولسوالۍ او د باب المندب تنګي په شاوخوا کې مهم او ستراتیژیک موقعیتونه ونیول.

د سبا (Saba) رسمي خبري اژانس وویل چې د «محبوب الوطن» او «جنوبي عمالقه» لواګانو، د ولسي مقاومت ځواکونو په ملاتړ، د تعز ولایت په لوېدیځ کې ذباب سیمه تر خپل واک لاندې راوستې ده.

دغو ځواکونو کلیدي ساحې تر لاسه کړې او باب المندب ته یې د حوثیانو د اکمالاتو لارې قطع کړې دي. په دغو عملیاتو کې یو ناڅرګند شمېر حوثي وسله وال وژل شوي یا ټپیان شوي او پوځي واسطې او تجهیزات یې تخریب یا ویجاړ شوي دي.

د اسرائیل د کورني وضعیت په اړه د سي آی اې (CIA) استخباراتي راپور او خبرداری .

د یوه تحقیقاتي راپور له مخې، د امریکا د مرکزي استخباراتي ادارې (CIA) په یوه پټ او محرمانه ارزونه کې خبرداری ورکړل شوی چې ژورې سیاسي، اقتصادي او ټولنیزې درزونه کېدای شي اسرائیل د کورني جنګ یا د سسټمیک سقوط له خطر سره مخ کړي.

دا استخباراتي تحلیل چې د «له دننه درز » تر سرلیک لاندې د اګسټ په میاشت کې چمتو شوی، د سي آی اې د بېړنیو او بدیلو استخباراتي ارزونو د تخصصي څانګې (Red Cell) لخوا چمتو شوی و.

په دې راپور کې د هغو شدیدو کورنیو فشارونو یادونه شوې چې د اکټوبر پر ۲۷مه له ټاکل شوو پارلماني ټاکنو مخکې له هېواد سره مخ دي.

په کلیدی ننګونو کې شدید اقتصادي رکود، د دفاعي لګښتونو لوړېدل، په اشغال شوې لوېدیځه غاړه کې د اسراییلي غصب کوونکو زیاتېدونکی تاوتریخوالی، او د سخت درېځو ارتودوکس (Haredi) یهودي ځوانانو لپاره له اجباري پوځي خدمت څخه د استثنا پر سر خپره شوې سخته ټولنیزه کینه او اندېښنې شاملې دي.

په روسيه کې د طاعون ناروغۍ او د امریکا غبرګون

د امریکا ولسمشر ډونالډ ټرمپ اعلان کړی چې واشنګټن په روسیه کې پر سوري طاعون  د یوه مشکوک کس د مړینې پېښه په دقت سره څاري او چمتو دی چې له مسکو سره مرسته وکړي.

ټرمپ د دوشنبې پر ورځ په سپینه ماڼۍ کې خبریالانو ته وویل: «موږ دا موضوع په ډېره جدیت سره ارزوو. موږ همدا اوس په دې اړه خبر شوو.»

نوموړي دغه مړینه «د روسیې لپاره لویه مسئله» وبلله او زیاته یې کړه: «کلونه وړاندې موندل شوې د نيمونيا درملنه اسانه وه، مګر باکټرياوو او مایکروپونو اوس مقاومت پیدا کړی او پیاوړي شوي دي. مګر موږ به له هغوی سره مرسته وکړو. له هر هغه چا سره چې له دې ډول ناورین سره مخ وي، موږ تل مرستې ته چمتو یو.»

د امریکا د بهرنیو چارو وزیر مارکو روبیو هم تایید کړه چې واشنګټن دا پرمختګونه او موندنې په دقیق ډول تعقیبوي.