دا بریدونه په داسې حال کې کېږي چې فلسطیني ډلې او منځګړي په قاهره کې د غزې د اوربند د هوکړې د راتلونکي پړاو د پرمختګ لپاره خبرې اترې کوي.
د روغتیايي سرچینو په وینا، د یکشنبې له سهار راهیسې د غزې په بېلابېلو سیمو کې د اسرائیلو په بریدونو کې لږ تر لږه لس فلسطینیان وژل شوي او ۲۹ نور ټپیان شوي دي. دا په داسې حال کې ده چې اسرائیل د اوربند له هوکړې څخه خپلو ورځنیو سرغړونو ته دوام ورکوي.
روغتیايي سرچینو اناتولیا خبري اژانس ته ویلي چې د غزې ښار په مرکز کې د "ریمال" سیمې د فلسطین میدان ته نږدې، یوې اسرائیلۍ بې پیلوټه الوتکې پر یوه ملکي موټر برید کړی چې په پایله کې یې څلور فلسطینیان وژل شوي او اوه نور ټپیان شوي دي. سرچینو همدارنګه زیاته کړې چې ۱۴ کلنه "هدیل ایمن جندي" چې د شنبې په ورځ په یوه برید کې ټپي شوې وه، نن یې د سختو ټپونو له امله ساه ورکړه.
د غزې په سویل کې د خان یونس ښار په لوېدیځه برخه کې د پولیسو پر یوې پوستې د اسرائیلو په برید کې پنځه فلسطینیان وژل شوي او ۱۷ نور ټپیان دي. په شمالي غزه کې بیا د "بیت لاهیا" ښارګوټي په لوېدیځ کې د اسرائیلو د سمندري ځواکونو له برید وروسته ۵ ټپیان د "السرايا" ساحوي روغتون ته وړل شوي دي.
د غزې په مرکزي برخه کې د "دیر البلح" ساحل ته څېرمه د اسرائیلو د سمندري ځواک د ماشینګڼو په ډزو کې یو تنکی ځوان کب نیوونکی وژل شوی دی. سربېره پر دې، د غزې ښار په سویل ختیځ "زیتون" سیمه کې د یوه ویجاړ شوي کور له خاورو څخه د دوو فلسطینیانو جسدونه را ایستل شوي چې د شنبې په ورځ د اسرائیلو په توپخانې برید کې ویشتل شوی و.
د اسرائیلو نسل وژنه او ډیپلوماټیکې هڅې
دا بریدونه په داسې حال کې کېږي چې په قاهره کې د اوربند د هوکړې د لومړي پړاو د بشپړولو او دویم پړاو ته د تېرېدو په اړه خبرې اترې روانې دي.
د تېر سپتمبر په میاشت کې د امریکا ولسمشر ډونالډ ټرمپ د اوربند لپاره یوه ۲۰ ماده ییزه طرحه اعلان کړه، چې په کې د اسرائیلي بندیانو خوشې کول، له غزې د اسرائیلو وتل، د یوې تخنیکي ادارې جوړول او د نړیوالو ثبات ساتونکو ځواکونو ځای پر ځای کول شامل وو.
که څه هم د ۲۰۲۵ کال د اکتوبر له ۱۰مې راهیسې رسمي اوربند نافذ شوی، خو د غزې د روغتیا وزارت وايي چې د اسرائیلو پوځ له هغه وخت راهیسې لږ تر لږه ۹۶۱ فلسطینیان وژلي او تر ۳۰۰۰ ډېر یې ټپیان کړي دي. د ۲۰۲۳ کال له اکتوبر راهیسې د اسرائیلو په نسل وژنه کې نږدې ۷۳ زره فلسطینیان وژل شوي او تر ۱۷۳ زره ډېر ټپیان شوي چې ډېری یې ښځې او ماشومان دي.
