د هغه یو اړخیز اوربند وخت چې کییف اعلان کړی و، د چهارشنبې په ورځ پوره کېده، خو اوکراین پر روسیې تور پورې کړ چې یوازې څو ساعته وړاندې یې نوي بریدونه کړي چې په پایله کې یې په جګړه ځپلي هېواد کې لږترلږه ۲۸ کسان وژل شوي دي.
روسي چارواکو د وړاندیز شوي اوربند له پیل څو ساعته وروسته د اوکراین د کوم برید په اړه راپور نه دی ورکړی، خو د اوکراین د سویلي سیمې زاپوریژیا چارواکو د چهارشنبې په سهار وویل چې مسکو د دوی پر بنسټیزو تاسیساتو بریدونه کړي دي.
مسکو او کییف هر یو په جلا جلا نېټو یو اړخیز اوربندونه اعلان کړي وو؛ روسیې غوښتنه کړې وه چې اوربند دې د مې په نهمه د دویمې نړیوالې جګړې د بریا ورځې له نمانځنې سره سمون ولري.
د اوکراین ولسمشر ولادیمیر زیلینسکي مسکو په "سختې بې شرمۍ" تورن کړ چې په داسې حال کې چې د جګړې د بندولو غوښتنه کوي، وژونکي بریدونه ترسره کوي.
د اوکراین د کورنیو چارو وزیر ایګور کلیمنکو د سې شنبې په ناوخته، د اوربند له پیل وړاندې وویل چې چارواکي په پولتاوا، خارکیف، دونېڅک، دنیپرو پیتروفسک، زاپوریژیا، خیرسون، اودیسا، چرنیګیف او سومي سیمو کې د روسي بریدونو د زیانونو په څېړلو بوخت دي.
کلیمنکو وویل: "تر اوسه پورې په ټول هېواد کې د نننیو روسي بریدونو له امله ۲۷ کسان وژل شوي او لږترلږه ۱۲۰ نور ټپیان دي." وروسته بیا د کراماتورسک ښار له لوري د یو بل تن د مړینې خبر هم ورکړل شو.
د هغې سیمې د مشر په وینا چې روسیې په ۲۰۱۴ کال کې له اوکراین څخه جلا کړې وه، د اوکراین د بې پیلوټه الوتکو په بریدونو کې هم ۵ ملکي وګړي وژل شوي دي. روسیې د سې شنبې په ناوخته، کله چې د اوکراین د اوربند وخت نږدې شوی و، د دنیپرو ښار هم په نښه کړ.
د اوکراین د بهرنیو چارو وزیر اندري سیبیګا په ایکس (پخواني ټویټر) کې ولیکل: "د اوکراین د اوربند وړاندیز پلي کېدو ته یوازې څو ساعته پاتې دي، خو روسیه د جګړې د پای ته رسولو هیڅ نښه نه ښيي. برعکس، مسکو وحشت نور هم زیات کړی دی."
زیلینسکي تر دې وړاندې په زاپوریژیا کې پر هغه برید چې ۱۲ کسان پکې ووژل شول، وویل چې د دې برید لپاره "هیڅ نظامي توجیه نشته". روسي بریدونو د کراماتورسک ښار مرکز هم په نښه کړ، چې په دونېڅک سیمه کې د کییف تر کنټرول لاندې وروستی مهم مرکز دی. هلته هم شپږ کسان ووژل شول.
دا بریدونه په تېرو څو اونیو کې تر ټولو خونړي وو او د سولې هڅې یو ځل بیا پڅې شوې دي.
سره له دې، د امریکا د بهرنیو چارو وزارت وايي چې د بهرنیو چارو وزیر مارکو روبیو د سې شنبې په ورځ د روسیې د بهرنیو چارو له وزیر سرګي لاوروف سره په ټیلیفون خبرې وکړې. د ویاند ټومي پیګوټ په وینا، دواړو لورو د امریکا او روسیې پر اړیکو، د اوکراین جګړې او پر ایران خبرې وکړې، خو نور جزییات یې ورنه کړل. روسیې هم د دې اړیکې پخلی کړی او ویلي یې دي چې د "دوه اړخیزو اړیکو پر مهالوېش" یې خبرې کړې دي.
