د وزارت لخوا پر ایکس (X) ټولنیزه شبکه په خپره شوې اعلامیه کې ویل شوي چې د پاکستان په بلوچستان او خیبر پښتونخوا ایالتونو کې، ځینې پټنځایونه د پنجشنبې په شپه د "هوايي ځواک" لخوا په نښه شوي دي. په اعلامیه کې دا نه دي ویل شوي چې دا بریدونه – چې په تېرو څو میاشتو کې د کابل لخوا لومړنی لوی برید دی – دقیقاً څنګه ترسره شوي.

که څه هم افغانستان جنګي جېټ الوتکې نه لري، خو په لندن کې د ستراتیژیکو مطالعاتو د نړیوال انسټیټیوټ د معلوماتو له مخې، دغه هېواد لږ تر لږه ۶ الوتکې او ۲۳ چورلکې لري. همدارنګه افغانستان ځواکونه بې پیلوټه الوتکې (ډرون) هم لري چې له پاکستان سره په تېرو نښتو کې یې کارولې دي.

د دفاع وزارت په اعلامیه کې ادعا شوې: "دا اډې، چې د ځینو مغرضو استخباراتي کړیو په همکارۍ د افغانستان په خلاف د بریدونو د پلانولو او تنظیمولو لپاره کارول کېدې، تر دې وړاندې هم د څو خونړیو بریدونو مرکزونه پاتې شوي وو."

اعلامیه زیاتوي: "د لومړنیو معلوماتو له مخې، په دغو عملیاتو کې ټاکل شوې موخې په بریالیتوب سره ویشتل شوې دي." خو د احتمالي مرګ ژوبلې په اړه یې جزیات نه دي ورکړي. د پاکستان پوځ او د اطلاعاتو وزارت تر اوسه د دې بریدونو په اړه غبرګون نه دی ښودلی.

د پاکستان او افغانستان ترمنځ روانې جګړې سږ کال سلګونه کسان وژلي دي. د چین په منځګړیتوب د دواړو لورو ترمنځ د ترینګلتیا کمولو هڅو تر اوسه کومه پایله نه ده ورکړې. اسلام اباد کابل تورنوي چې هغو وسله والو ته یې پناه ورکړې چې په پاکستان کې بریدونه کوي، خو طالبان دا تورونه ردوي او وايي چې دا د پاکستان کورنۍ ستونزه ده.

تېره اونۍ پاکستان د افغانستان پر ځینو ولایتونو هوايي بریدونه کړي وو، چې طالبانو وویل په هغو کې د ۱۱ ماشومانو په ګډون ۱۳ کسان وژل شوي وو. اسلام اباد بیا ویلي وو چې هغو بریدونو کې ۲۶ وسله وال وژل شوي او دا د پاکستان په شمال لویدیځ کې د وروستیو بریدونو په ځواب کې ترسره شوي وو.

د افغانستان دفاع وزارت خبرداری ورکړی: "افغانستان به نور د خپل امنیت او ثبات پر وړاندې هیڅ ګواښ ونه زغمي. موږ به له خپلو ټولو امکاناتو کار واخلو ترڅو هر ډول ګواښ په خپله سرچینه کې له منځه یوسو."