په پاکستان او هند کې بیا د مانسون (موسمي) بارانونو لړۍ روانه ده.
د افغانستان په ختیځ کې د وروستیو سختو بارانونو نه وروسته د راوتلو سیلابونو له امله په لسګونو تنو ژوند د لاسه ورکړی او په لسګونو تنه نور لا درکه شوي دي.
د ویلو ده چې سیلابونو د نورستان ولایت مرکز او ځینې نورو سیمو ته د پام وړ ځاني او مالي زیانونه اړولي دي.
په پاکستان کې د سختو بارانونو او سیلابونو له امله د ژوند له لاسه ورکړیو کسانو شمېر ۳۷ ته ورسېد.
په خیبر پښتونخوا او پنجاب سربېره په ګلګت بلتستان کې د جولای له ۱۹مې راهیسې د مانسون فصل بارانونو د ناڅاپي سیلابونو او ځمکې ښوېدو لامل شوي دي. چارواکو ویلي چې د ناڅاپي سیلابونو، تالندې او برېښنا نیونې په څېر پېښو کې په خیبر پښتونخوا کې ۲۰ او په پنجاب کې ۱۷ کسانو ژوند له لاسه ورکړی دی. د ګلګت بلتستان او د پاکستان تر ادارې لاندې ازاد جمو او کشمیر کې هم د سختو بارانونو او سیلابونو له امله کرنیزو فصلونو او د خلکو کورونو ته زیانونه اوښتي دي.
بل لور ته، د هند په شمال ختیځ ایالت "آسام" کې د سختو بارانونو له امله په رامنځته شویو سیلابونو کې د مړو شمېر ۴۱ ته لوړ شوی دی. د آسام ایالت د طبیعي پېښو پروړاندې د مبارزې ادارې ویلي چې په تېرو ۲۴ ساعتونو کې د سیلابونو له امله ۱۰ نور کسان هم مړه شوي دي.
په دې سره په آسام ایالت کې د ټولو قربانیانو شمېر ۴۱ ته ورسېد او د دغه ایالت په ۲۵ سیمو کې شاوخوا ۷۲۷ زره کسان له سیلابونو اغېزمن شوي دي. د آسام ایالت اعلی وزیر "هیمانتا بسوا شرما" ویلي چې له ۱۰۰ څخه ډېر کسان لادرکه دي او ښايي د مړو شمېر نور هم زیات شي. په ایالت کې د ژغورنې روانو عملیاتو کې د هند پوځ هم مرسته کوي.
