ولسمشر رجب طیب اردوغان وايي: "په غزه او لبنان کې صهیونیسټي قاتلان د هر قانون، قاعدې او اصل تر پښو لاندې کولو سره د وینې تویدنې ته دوام ورکوي."
د تورکیې ولسمشر رجب طیب اردوغان ویلي چې لا تر اوسه د روسیې او اوکراین جګړه پای ته نه ده رسېدلې، خو سیمه اوس پر ایران د بریدونو له امله د "درنې اقتصادي بیې" په پرې کولو پیل کړی دی.

اردوغان د جمعې په ورځ د تورکیې په لویدیځ ښار 'ادرنه' (Edirne) کې د پرانیستې په یوې مراسمو کې وویل: "مخکې له دې چې د روسیې او اوکراین جګړه پای ته ورسیږي، زموږ سیمه اوس پر ایران د بریدونو درنه اقتصادي بیه پرې کوي."

هغه دا هم وویل چې په غزه او لبنان کې لا هم د وینې تویدنه دوام لري. اردوغان وویل: "په غزه او لبنان کې صهیونیسټي قاتلان د هر قانون، قانوني اصولو او قواعدو په تر پښو لاندې کولو سره د وینې تویدنې ته دوام ورکوي."

رجب طیب اردوغان د چهارشنبې په ورځ وویل چې په لبنان او سوریه کې د اسرائیلو اقدامات د تورکیې امنیت ته یو ګواښ دی. هغه وویل: "د تورکیې امنیت یوازې په هاتای (زموږ تر ټولو سویلي ولایت) کې نه پیلیږي، بلکې دا په حلب، دمشق او بیروت کې پیلیږي." هغه خبرداری ورکړ چې ترکیه به په خپلو ګاونډیو هیوادونو کې د اسرائیلو لخوا هیڅ ډول "تحمیل شوي حقایق"  ونه زغمي.

اردوغان زیاته کړه: "د اوسنۍ ادارې تر مشرۍ لاندې، اسرائیل د مصیبتونو د تولید په یوه فابریکه بدل شوي چې یوازې په وینه او اوښکو چلیږي او له بې ثباتۍ او ګډوډۍ پرته بل څه نه تولیدوي." هغه ژمنه وکړه چې د دغه ډول قتل عامونو عاملین به د خپلو اعمالو ځواب ویلو ته اړ کړي.

اسرائیلو د مارچ له دویمې راهیسې د لبنان په سویل باندې بمبارۍ پیل کړې دي، چې لبنان یې هم د منځني ختیځ روانې جګړې ته راکش کړی دی.