د حماس د سیاسي دفتر د مشر خلیل الحیه په مشرۍ یو لوړپوړی پلاوی به د مصر پلازمېنې قاهرې ته سفر وکړي. د دې سفر موخه د فلسطین د موضوع په ځانګړي ډول په غزه کې د اوربند د تړون د دایمي کولو په اړه خبرې اترې دي.
د حماس یوې سرچینې ویلي: «د حرکت د مشر خلیل الحیه په مشرۍ یو لوړپوړی پلاوی به نن شپه قاهرې ته ورسیږي ترڅو له مصري چارواکو سره وګوري.»
دغې سرچینې ویلي چې دا د حماس د مشرۍ (مذاکراتي مسوولیت) تر اخیستو وروسته مصر ته د خلیل الحیه لومړی سفر دی. دغه پلاوی به د مصر د استخباراتو د عمومي ادارې له مشر تورن جنرال حسن رشاد سره وګوري.
په دې کتنه کې به د فلسطین د قضیې په اړه پر یو لړ مسایلو او پرمختګونو خبرې وشي، چې تر ټولو مهمه یې په غزه کې د اوربند د تړون دایمي کول دي.
په دغه پلاوي کې د خلیل الحیه سربېره، د حماس د شورا د مجلس مشر محمد درویش، د حماس د بهرنیو چارو مسوول خالد مشعل، د لویدیځې غاړې مسوول زاهر جبارین او د عربي او اسلامي اړیکو د دفتر مسوول باسم نعیم هم شامل دي.
