دا کتنه د غزې د سولې د پلان د راتلونکي پړاو د لارې پر نقشې متمرکزه وه او ګډونوالو د اسرائیل د بریدونو د درولو لپاره د نړیوالو اقداماتو غوښتنه وکړه.
د سرچینو په وینا، د تورکیې د ملي استخباراتو د سازمان (MIT) مشر ابراهیم قالن په استانبول کې د حماس د سیاسي دفتر له مشر خلیل الحیه او ورسره مل پلاوي سره وکتل. په دې لیدنه کې د غزې د سولې د پلان د دویم پړاو د پرمخ وړلو پر هڅو بحث وشو.
د انادولو خبري اژانس د معلوماتو له مخې، په دې کتنه کې د سولې د پلان دویم پړاو ته د لېږد لپاره پر چمتو شوې لارې نقشې تمرکز وشو او ګډونوالو د دغه وړاندیز په اړه د حماس مثبت ځواب ته اشاره وکړه.
دواړو لورو اندېښنه څرګنده کړه چې اسرائیل د سولې لارې نقشې ته د ځواب ورکولو پر ځای په غزه کې خپل پوځي تېری نور هم سخت کړی دی. دوی ټینګار وکړ چې نړیواله ټولنه باید ژر تر ژره د اسرائیل د تېري د مخنیوي لپاره اقدام وکړي.
د نړیوالو د خوځښت راوستلو هڅې:
ګډونوالو په داسې حال کې چې په غزه کې د اسرائیل پوځي نسل وژنه دوام لري، په اشغال شوې لوېدیځه غاړه او ختیځ بیت المقدس کې د فلسطینیانو د حقونو د نقض په اړه هم خبرې وکړې. دوی په اشغال شویو سیمو کې د اسرائیلي مېشت ځایونو د جوړولو پر دوام او د غیرقانوني اسرائیلي مېشتو کسانو لخوا د تاوتریخوالي پر زیاتوالي رڼا واچوله.
په دې لیدنه کې په غزه کې د بشري وضعیت په اړه هم بحث وشو. ترکیې یو ځل بیا د سیاسي هڅو او بشري مرستو د رسولو په برخه کې له غزې سره خپل ملاتړ تایید کړ.
په غونډه کې د تورکیې هغو هڅو ته هم اشاره وشوه چې غواړي نړیواله ټولنه په غزه کې د اسرائیل د عام وژنې د پای ته رسولو، د فلسطینیانو د حقونو د خوندیتوب او سیمې ته د بشري مرستو د زیاتولو لپاره متحرک کړي.
ګډونوالو په غزه کې د سولې د تامین په موخه د ترکیې، قطر او مصر ګډې هڅې خورا مهمې وبللې. د حماس پلاوي هم د تورکیې له ولسمشر رجب طیب اردوغان څخه مننه وکړه چې هېواد یې په غزه کې د سولې لپاره پراخې هڅې کوي.
