"د نیویارک ټایمز د راپور له مخې، د احتمالي مخامخ خبرو اترو د بل پړاو په اړه بحثونه روان دي، که څه هم تر اوسه کومه نېټه نه ده ټاکل شوې.
د چارواکو په وینا، متحده ایالاتو تېره اونۍ په اسلام اباد کې د سولې د خبرو پر مهال پر ایران فشار راوړی چې د ۲۰ کلونو لپاره د یورانیمو غني کول وځنډوي.
ایران په خپل رسمي ځواب کې چې د دوشنبې په ورځ یې لېږلی، تر پنځو کلونو پورې د لنډ مهاله ځنډ وړاندیز کړی دی. یوه امریکایي چارواکي زیاته کړې چې ولسمشر ډونالډ ټرمپ دا وړاندیز رد کړی دی.
واشنګټن دا غوښتنه هم کړې چې تهران باید په لوړه کچه غني شوي یورانیم له خپلې خاورې وباسي. خو د راپور له مخې، ایران د دې غوښتنې په وړاندې مقاومت کړی او ټینګار یې کړی چې دا مواد دې په هېواد کې دننه پاتې شي، خو په بدل کې یې وړاندیز کړی چې دا مواد په پام وړ ډول رقیق (کمزوري) کړي ترڅو د وسلو لپاره د کارونې وړ نه وي. امریکایي چارواکي استدلال کوي چې اندېښنه لا هم پر ځای ده، ځکه ایران به په راتلونکي کې بېرته د دغو موادو د غني کولو وړتیا ولري.
د امریکا د ولسمشر مرستیال جي ډي وینس د دوشنبې په ورځ له فاکس نیوز سره په خبرو کې وویل چې په اسلام اباد کې خبرو اترو پرمختګ کړی او له ایراني چارواکو سره یې ځینې «ښې خبرې» شوې دي. هغه وویل چې اوس «پرېکړه د ایران په لاس کې ده»، او زیاته یې کړه چې اصلي پوښتنه دا ده چې ایا تهران به د پروسې د پرمخ وړلو لپاره کافي انعطاف وښيي که نه.
وینس وویل ایران د خپل دریځ بدلولو لپاره یو څه لېوالتیا ښودلې، خو «پوره مخکې نه دي تللي.» کله چې ترې د نویو خبرو اترو د پیل په اړه وپوښتل شول، هغه وویل چې دا پوښتنه باید «له ایرانیانو وشي.»
د هرمز تنګي په اړه ونس وویل چې د دې تنګي وضعیت به په هر ډول وروستۍ هوکړه کې مرکزي رول ولري. هغه زیاته کړه چې د یوې «لویې معاملې» چانس شتون لري، خو ټینګار یې وکړ چې د دې کار د شونتیا مسؤلیت اوس د ایران پر غاړه دی."
