په داسې حال کې چې د روغتیا په څېر حساسو موضوعاتو کې د مصنوعي ځیرکتیا (AI) د چټ‌بوټونو لارښوونو بحثونه راپارولي، یوه پېښه چې ادعا کیږي د همدې حالت له امله رامنځته شوې، محکمې ته راجع شوې ده.

یوه کاروونکي د OpenAI پر وړاندې دعوه کړې او ادعا کوي چې د مصنوعي ځیرکتیا د غیرمجازو (بې اجازې) طبي مشورو له امله یې رواني روغتیا خرابه شوې او هغه يي په روغتون کې تر بستر کیدو پورې رسولی وو.

په سان فرانسسکو کې د ثبت شوې دعوې له مخې، ۳۹ کلن ډیویډ روزنتال د درملو په انتخاب، د خوراک (ډوز) په لارښوونو او د ډاکټر د نسخې په له پامه غورځولو کې له ChatGPT څخه د یوه لارښود په توګه کار اخیستی و.

په شکایت پاڼه کې راغلي چې مصنوعي ځیرکتیا دغه لارښوونې له کوم تخصصي جواز یا مسلکي قضاوت پرته وړاندې کړې دي، چې دا د کالیفورنیا له قوانینو څخه سرغړونه ده.

دغه کاروونکی چې له دې وړاندې یې د پاملرنې کموالي او خپګان (ډیپریشن) په څېر ناروغۍ لرلې، تېر کال د اونیو لپاره په روغتون کې تر درملنې لاندې و.

هڅونه او د روږدیتوب پروسه

دغه کاروونکي تېر کال د جون په میاشت کې د شعر لیکلو لپاره له دې پلټفارم څخه کار اخیستل پیل کړل، خو په لنډ وخت کې پر دغه چټ‌بوټ روږدی شو.

د ادعاوو له مخې، ChatGPT د درملو د تعاملاتو په اړه ناسمې لارښوونې وکړې او د هغه ډاکټر لخوا د تجویز شویو درملو (چې د رواني حالت د انډول لپاره وو) د پرېښودو د پرېکړې ملاتړ یې وکړ.

وکیلان استدلال کوي چې مصنوعي ځیرکتیا د خوندي پروتوکولونو پر ځای د کاروونکي د تعامل د زیاتوالي لپاره ډیزاین شوې ده، او دې حالت د هغه پر رواني روغتیا منفي اغېزه کړې ده.

د مصنوعي ځیرکتیا د مسؤلیت په اړه بحث

کارپوهان پام دې ته اړوي چې د مصنوعي ځیرکتیا  ماډلونه کولی شي په حساسو موضوعاتو کې پوښتنو ته ناسم ځوابونه ورکړي، او د څارنې میکانیزمونه یې نیمګړي دي.

حقوق پوهان وایي چې مصنوعي ځیرکتیا یو محصول دی او باید د اټکل وړ زیانونو په وړاندې مسؤله وګڼل شي. خو د OpenAI شرکت تر اوسه په دې اړه کومه تبصره نه ده کړې.