د حوثیانو پوځي ویاند یحیی سریع په المسیره ټلویزیون کې، چې په حوثیانو پورې تړاو لري، یوه اعلامیه خپره کړه.

سریع وویل: "زموږ وسله والو ځواکونو لږه شیبه وړاندې د صعده ولایت په هوایي حریم کې یوه جنګي الوتکه له ځمکې څخه هوا ته ویشتونکي توغندي سره په نښه کړه. توغندی په الوتکه په مستقیم ډول ولګېد او اوس د غورځېدو له خطر سره مخ ده." هغه ادعا وکړه چې په نښه شوې الوتکه د سعودي عربستان «ټایفون» ډوله جنګي الوتکه وه او د دغه هېواد په لوېدیځ کې د طایف له پوځي اډې څخه پورته شوې وه.

سعودي عربستان تر اوسه په دې اړه کومه تبصره نه ده کړې.

بلخوا په حوثیانو پورې تړلي المسیره ټلویزیون خبر ورکړی چې د یمن پلازمېنه صنعا د هوایي بریدونو هدف ګرځېدلې ده.

تر اوسه د دغو بریدونو د پایلو په اړه کوم معلومات نه دي شریک شوي.

یمن د هغې کورنۍ جګړې شاهد دی چې د ۲۰۱۴ کال په سپټمبر کې د حوثیانو لخوا د پلازمېنې صنعا او ځینو نورو ولایتونو تر کنټرولولو وروسته پیل شوه.

په داسې حال کې چې په هېواد کې د حکومتي ځواکونو او حوثیانو ترمنځ نښتې بشري ناورین لا پسې ژوروي، د سعودي عربستان په مشرۍ عربي ایتلاف د ۲۰۱۵ کال له مارچ راهیسې د یمن له هغه حکومت څخه ملاتړ کوي چې د نړیوالې ټولنې لخوا په رسمیت پېژندل شوی دی.