د Axios خبري اژانس د دوو امریکایي چارواکو په حواله خبر ورکړی چې د ایران سپاه پاسداران د دوشنبې په شپه د هرمز له تنګي څخه پر تېرېدونکو سوداګریزو کښتیو لږ تر لږه دوه توغندي فیر کړي دي.

یو امریکایي چارواکي ویلي چې په دې برید کې دوه سوداګریزې کښتۍ سختې زیانمنې شوې دي، خو کومه مرګ ژوبله نه ده اوښتې.

د برتانیا د سمندري سوداګرۍ عملیاتو ادارې (UKMTO) د سې شنبې په سهار په یوه اعلامیه کې وویل، د عمان د "لیما" سیمې ختیځ ته په شاوخوا ۱۵ کیلومترۍ کې یو ټانکر چې د سویل په لور روان و، د یوې نامعلومو څیز لخوا ویشتل شوی چې له امله یې په کښتۍ کې اور لګېدلی؛ خو د کومې ځاني مرګ ژوبلې یا چاپېریال ته د زیان رسېدو خبر نه دی ورکړل شوی.

دا پرمختګ په داسې حال کې رامنځته کېږي چې د امریکا او ایران ترمنځ غیر مستقیمې خبرې تېره اونۍ پرته له کومې څرګندې پایلې پای ته ورسېدې. دا خبرې د ۶۰ ورځني اوربند په ترڅ کې د ډیپلوماسۍ لپاره د زمینې برابرولو په موخه شوې وې، خو کومې دایمي سولې ته لاره هواره نه شوه.

د امریکا ولسمشر ډونالډ ټرمپ د دوشنبې په ورځ، د ایران د پخواني مذهبي مشر علي خامنه‌یي له جنازې وروسته د تهران د ننګونکي دریځ په غبرګون کې خپل هوډ تکرار کړ او ویې ویل چې امریکا به یا له ایران سره یوې هوکړې ته ورسېږي او یا به هم "کار تمام کړي".

د وال سټریټ ژورنال (WSJ) د یوې غږیزې ثبت شوې پارچې له مخې چې د دوشنبې په ورځ یې ترلاسه کړې، راپور ورکړی چې د ایران سپاه پاسداران د اونۍ په پای کې د سمندري راډیو له لارې کښتیو ته خبرداری ورکړی و: "زموږ توغندي او بې پیلوټه الوتکې (ډرون) پر تاسو ډزو ته چمتو دي."

د وال سټریټ ژورنال د راپور له مخې، یوه له برید شویو کښتیو څخه "الرقیات" (Al Rekayyat) نومېږي چې د قطر د LNG (مایع طبیعي ګاز) صنعت د لېږد رالېږد شرکت "ناکیلات" پورې اړه لري. په راپور کې ویل شوي چې توغندی د کښتۍ د ماشین خونې پر پورتنۍ برخه لګېدلی دی.

په غږیز ریکارډ کې اورېدل کېږي: "په ماشین خانه کې اور لګېدلی او ځای له لوګي ډک دی. د نورو زیانونو ارزونه نه شي کېدای. د کښتۍ ټوله عمله خوندي ده او د کښتۍ په ښي خوا کې راټول شوي دي."

وال سټریټ ژورنال ویلي چې دا برید د عمان په خلیج کې، د هرمز تنګي په خوله کې شوی دی.

پانګوال په خلیج کې د تیلو د صادراتو وضعیت او همدارنګه د هرمز په تنګي کې د سمندري تګ راتګ د راتلونکي په اړه د امریکا او ایران ترمنځ روانې خبرې په دقت سره څاري.