د تورکیې د استخباراتو رئیس ابراهیم کالن ویلي چې د فلسطین مسلې ته له رسیدګۍ او د اسرائیلو د اشغال له پای ته رسولو پرته په منځني ختیځ کې سوله نشي راتلای.

کالن د جمعې په ورځ د استانبول د کنګرې په مرکز کې د ټي آر ټي (TRT) نړیوال فورم ته د وینا پر مهال، وویل:

" له غزې پرته فلسطین ناشونی دی، او د اسرائیلو د اشغال له پای ته رسولو پرته سوله ناشوني ده.."

نوموړي زیاته کړه: "فلسطینیان ستونزه نه ده؛ بلکې ستونزه اشغال دی،" هغه ټینګار وکړ چې "د اشغال له پای ته رسولو پرته به په منځني ختیځ کې هیڅ حل لاره، سوله او عدالت شتون ونلري."

کالن وویل چې غزه د فلسطین نه بېلېدونکې برخه ده او د فلسطینیانو مبارزه له ځمکنیو مسایلو هاخوا د عدالت او برابرۍ پراخو اصولو ته غځېدلې ده.

هغه وویل: "غزه د فلسطین یوه برخه ده، او فلسطین د ټولو لپاره د عدالت، عزت او برابرۍ لپاره د یوې پراخې مبارزې برخه ده."

"دا یوازې د یوې ټوټې ځمکې مسله نه ده؛ بلکې دا د نړیوالو ارزښتونو او اخلاقي اصولو په اړه هم ده."

تر دې وړاندې، په همدې غونډه کې د وینا پر مهال د تورکیې ولسمشر رجب طیب اردغان وویل چې وروستیو سیمه ییزو تحولاتو وښودله چې اوسني نړیوال سیسټم د "تسلیمۍ سپین بیرغ پورته کړی دی". نوموړي نړیوال بنسټونه په دې تورن کړل چې په غزه او اشغال شوې لوېدیځه غاړه کې د اسرائیلو د تاوتریخوالي د دوام پر وړاندې بې تفاوته پاتې دي او یوازې ننداره کوي.