د اسرائیلو د کابینې بدنامه او د سختدریځي وزیر د یهودانو طاقت" ګوند مشر، ایتامار بېن ګویر، د اسرائیلي رسنیو په وینا، په اوو کلونو کې د "داوطلبانه کډوالۍ" تر نامه لاندې له محاصره شوې غزه څخه د ۱.۸۶ میلیونه فلسطینیانو د ایستلو یو پلان وړاندې کړی دی.

بېن ګویر دا طرحه چې "Disengagement 710" (جلاوالی ۷۱۰) نومېږي، د تېرې پنجشنبې په ورځ د خپلو ټاکنیزو منډو ترړو د یوې برخې په توګه په یو خبري کنفرانس کې اعلان کړه. دا اعلان وروسته له هغه وشو چې "یدعوت احرونوت" ورځپاڼې د دغې طرحې جزییات خپاره کړل.

په دې پلان کې د پروژې د پلي کولو لپاره د یوه ځانګړي "کډوالۍ وزارت" جوړول او په منونکو هېوادونو کې د کډوالو لپاره د "جذب کڅوړو" د مالي تمویل وړاندیز شوی دی.

بېن ګویر د دې طرحې د وړاندې کولو پر مهال ادعا وکړه چې داسې هېوادونه شته چې د فلسطینیانو منلو ته "چمتو" دي او "ډېر شمېر خلک غواړي له غزه ووځي." خو "یدعوت احرونوت" ویلي چې تر اوسه داسې کوم هېواد نه دی پېژندل شوی چې په رسمي ډول یې له غزه څخه د دومره لوی شمېر فلسطینیانو منلو ته چمتووالی ښودلی وي.

د رپوټ له مخې، دا پلان په لومړي کال کې د ۲۵۰ زره، په دریو کلونو کې د ۱.۱۱ میلیونه او په اوو کلونو کې د نږدې ۱.۸۶ میلیونه فلسطینیانو ایستل په نظر کې لري. بېن ګویر پلان لري چې دا طرحه، چې میاشتې ورباندې کار شوی، د خپل ټاکنیز کمپاین اصلي برخه وګرځوي. د هغه ګوند همدارنګه پلان لري چې په راتلونکي حکومت کې د ګډون لپاره دا طرحه د یو مهم شرط په توګه وړاندې کړي.

په دې طرحه کې هر هغه کس یا کورنۍ ته چې غزه پرېږدي، د یو هدف هېواد ټاکل، قانوني حیثیت، اسناد، ویزې، د سفر لګښت او لومړنی استوګنځی ورکول شامل دي. دا پلان په ۱۲ اصولو ولاړ دی، چې یو یې "داوطلبانه وتل" بلل شوي او دا شرط پکې ایښودل شوی چې "هېڅوک باید پرته له دې چې یو هېواد یې منلو ته چمتو وي او قانوني حیثیت ورکړي، له غزه ونه وځي."

همدارنګه هغو هېوادونو او بنسټونو ته به د هغوی د "کړنې، امنیتي ارزونې او کلني هدفونو" پر بنسټ پیسې ورکول کېږي چې دا کډوال مني. د دې پروژې د پیل لپاره د اسرائیلو لخوا د ۳.۳ میلیارده ډالرو لومړنۍ پانګونې ته اړتیا ده او د ۱۶.۶ میلیارده ډالرو پورې د مالي چوکاټ وړاندوینه شوې چې په نړیواله برخه اخیستنه او له کوربه هېوادونو سره په تړونونو پورې اړه لري.

دا مهال په محاصره شوې غزه کې شاوخوا ۲.۱۳ میلیونه فلسطینیان ژوند کوي. اسرائیلو، چې د غزه ۷۰ سلنه خاوره یې لاندې کړې، د ۲۰۲۳ له اکتوبر راهیسې د نسل وژنې په ترڅ کې له ۷۳ زره ډېر فلسطینیان وژلي او تر ۱۷۴ زره ډېر یې ټپیان کړي دي. شنونکي اټکل کوي چې د وژل شویو اصلي شمېر ښايي تر ۲۰۰ زرو پورې ورسېږي.