"د جولای ۱۵مه یوازې هغه شپه نه وه چې یوه خاینانه کودتا پکې ناکامه شوه، بلکې دا د ډیموکراسۍ یوه لویه بریا ده چې په تاریخ کې په زرینو کرښو لیکل شوې؛ هغه شپه چې زموږ ملت د خپلې ارادې، ډیموکراسۍ او خپلواکۍ لپاره خپل ځانونه قربان کړل."
د تورکیې ولسمشر رجب طیب اردوغان د جولای د ۱۵مې د ډیموکراسۍ او ملي یووالي د ورځې په مناسبت یوه مقاله لیکلې چې عنوان یې دی: "د جولای ۱۵مه: د تورکیې د پېړۍ د خپلواکۍ اعلامیه".
ولسمشر اردوغان خپله مقاله، چې په ورځپاڼو کې خپره شوې، په دې جملو پیل کړې: "د هغې بدمرغې شپې پوره لس کاله تېر شول چې د تاریخ لاره یې بدله کړه او یو ملت په ګډه د خپلې خپلواکۍ او راتلونکي لپاره د خپل ځان په بیه مبارزه وکړه."
هغه په خپله مقاله کې داسې ارزونه کړې:
"د جولای ۱۵مه یوازې د یوې خاینانه کودتا د ناکامولو شپه نه وه، بلکې دا د ډیموکراسۍ یوه لویه بریا وه. په هغه شپه زموږ نجیب ملت امپریالیستانو او د هغوی ملګرو ته، چې زموږ د وطن د اشغال هڅه یې کوله، د تاریخ تر ټولو لوی درس ورکړ، کټ مټ لکه څنګه چې یې د خپلواکۍ په جګړه کې ورکړی و.
د جولای ۱۵مه د هغه ایمان او هوډ داستان دی چې زر کاله وړاندې په ملازګرد کې، ۵۰۰ کاله وړاندې د استانبول په دیوالونو کې د سلطان فاتح د خوبونو رښتیا کولو لپاره، او سل کاله وړاندې د وطن د دفاع لپاره ښودل شوی و. دا زموږ د اصیل ملت د مېړانې هغه سلسله ده چې یو ځل بیا یې په میدانونو کې تاریخ په زرینو کرښو ولیکه."
اردوغان په خپله مقاله کې ټینګار کړی چې کله یې ملت میدانونو او هوایي ډګرونو ته راوباله، نو دا یو ساده بلنه نه وه، بلکې د ملت پر سرښندنې او زړورتیا یو لوی باور و. هغه زیاته کړه:
"موږ د خپلو پلرونو د 'یا خپلواکي یا مرګ' شعار یو ځل بیا را ژوندی کړ. زموږ ملت هم په ډېر اخلاص سره دغه غږ ته لبیک ووایه او د خپل ځان او روح په قربانولو سره یې د هیواد ساتنه وکړه. د الله ډیر شکر کوو چې ملت دا باور سپک نه کړ او خپله خپلواکي یې په خپله وساتله. په هغه شپه ۲۵۳ هیوادوال شهیدان او له ۲۷۰۰ څخه زیات ټپیان شول، چې هر یو یې زموږ د هیواد او ملي ارادې د ساتنې د سرښندنې نښه ده."
"په هره برخه کې مو د ګولن د ترهګرې ډلې ریښې وباسلې"
ولسمشر اردوغان وویل: "په تېرو لسو کلونو کې مو د ګولن له خونړۍ ترهګریزې ډلې سره په هیواد کې دننه او نړیواله کچه بې له کومې جوړجاړي مبارزه کړې ده." هغه زیاته کړه:
"زموږ لپاره د دې سرطاني حجرې پاکول چې د دولت په داخل کې ننوتی وه، د خپلو شهیدانو په وړاندې یو لوی پور و. موږ له بیوروکراسۍ څخه نیولې تر پوځ، قضا او سوداګرۍ پورې په هره برخه کې د ګولن ترهګرې ډلې ریښې وچې کړې. خو دا باید هېره نه کړو چې دا مبارزه یوازې په هغې شپې پورې محدوده نه ده. د داسې فتنو د بیا راپورته کېدو د مخنیوي یوازینۍ لاره ده چې د جولای ۱۵مې روحیه تل ژوندۍ وساتو او راتلونکو نسلونو ته یې انتقال کړو."
"د دې ملت تر ټولو لوی ځواک یووالی او ورورولي ده"
اردوغان خپله مقاله په دې ټکو پای ته ورسوله:
"د جولای ۱۵مې په لسمه کلیزه کې، نن تورکیه تر بل هر وخت ډېره قوي، ډېره هوډمنه او یو موټې ده. تر څو چې په دې خاوره کې د جولای ۱۵مې روحیه ژوندۍ وي، د خاینانو مغرضانه پلانونه او د هغوی د تر شا نړیوالو سناریو لیکونکو ناپاکې لوبې به هیڅکله بریالۍ نشي.
په دې مناسبت، د هغې تورې شپې ټولو شهیدانو ته د الله له درباره د رحمت او غازیانو ته د اوږد او برکتي عمر دعا کوم. الله دې زموږ دغه نجیب ملت ته بیا داسې خاینانه شپې نه ښکاره کوي. د دې ملت تر ټولو لوی ځواک د هغه یووالی او هغه پخوانۍ ورورولي ده چې له زرو کلونو راهیسې په خوښیو او غمونو کې پالل شوې ده. الله دې زموږ یووالی او ورورولي تلپاتې لري."
