تورکیې او سویلي کوریا د سه شنبې په ورځ د اټومي انرژۍ د فابریکو د تمویل په برخه کې د همکارۍ یو تفاهملیک لاسلیک کړ، چې دا د دواړو هېوادونو ترمنځ د اقتصادي او ستراتیژیکو اړیکو د لا ژورولو په هڅو کې یو نوی ګام بلل کېږي.
دا اعلان په سیول کې د تورکیې د ولسمشر رجب طیب اردوغان او د سویلي کوریا د ولسمشر 'لي جای-میونګ' تر لیدنې وروسته، په یوه ګډه خبري غونډه کې وشو.
اردوغان وویل چې دواړو مشرانو په بېلابېلو سکتورونو کې په "یوه خوځنده او راتلونکي ته د متوجه چلند" له لارې د دوه اړخیزو همکاریو د پیاوړتیا پر لارو چارو خبرې وکړې.
اردوغان وویل، په دې خبرو کې د دوه اړخیزې سوداګرۍ پر پراختیا هم تمرکز وشو، چې تېر کال شاوخوا ۱۱ میلیارده ډالر وه او اوسمهال د ۱۵ میلیاردو ډالرو هدف ته د رسولو هڅه یې کېږي.
د تورکیې ولسمشر یادونه وکړه چې انقره او سیول د نړیوالو مسایلو په اړه ورته نظرونه لري، او د کوریا په ټاپووزمه کې یې د تلپاتې سولې او ثبات د رامنځته کولو په موخه د خبرو اترو له بهیر څخه د ترکیې ملاتړ څرګند کړ.
نوموړي همدارنګه په دفاعي همکاریو کې پرمختګونو ته اشاره وکړه او د تورکیې د 'فیرتینا' (Firtina) ځانګرځېدونکو توپونو او 'التای' (Altay) جنګي ټانکونو پر سر له ګډ کار وروسته، د لا زیاتو ګډو پروژو غوښتنه وکړه.
د سویلي کوریا ولسمشر 'لي' وویل چې دواړو هېوادونو د دفاعي صنایعو په برخه کې د همکارۍ پر ژورولو هوکړه کړې، چې دا له سوداګرۍ او انرژۍ اخوا د دوی د شراکت د پراخولو لپاره یوه ګډه ژمنه په ډاګه کوي.
