د ناټو سکرټر جنرال مارک روټه  د سه شنبې پر ورځ وویل چې په وروستۍ پېښه کې د بلغاریا ساحل ته نږدې پر تورې بحیرې د دوو بېړیو له ویشتل کېدو وروسته، دا سازمان چمتو دی ترڅو خپل «دفاعي تدابیر د اړتیا له مخې عیار او سم کړي.»

روټه د بلغاریا له لومړي وزیر سره له خبرو وروسته په انټرنیټ کې ولیکل: «ناټو د تورې بحیرې په سیمه کې له خپلو متحدینو سره نږدې همکارۍ ته دوام ورکوي. موږ مخکې له مخکې زموږ په ختیځه برخه کې خپل حضور پیاوړی کړی او د امنیتي وضعیت پام کې نیولو سره به د اړتیا په صورت کې به د دفاع کچه برابره کړو.»

په ورته وخت کې، د اروپايي کمېسیون مشرې فون دیر لاین د بلغاریا ساحل ته نږدې پر سوداګریزو بېړیو د ډرون بریدونه په کلکه وغندل.

فون دیر لاین پر ایکس (X) ولیکل: «توره بحیره پر اوکراین د روسیې د تیري نوی ډګر شوی دی. دا بالکل د منلو وړ نده.» هغې زیاته کړه چې دغه بریدونه د عملې غړي له خطر سره مخ کوي او د سیمې امن ګواښي، او له بلغاریا سره یې خپله خواخوږي او ملاتړ څرګند کړ. هغې وویل: «هغه کسان چې د دې مسوول دي باید حتما ځواب ویونکي شي.»

تر دې مخکې د سه شنبې په ورځ د بلغاریا لومړي وزیر رومن رادېف (Rumen Radev) وویل، د شپې پر ۱:۳۰ بجو د "چلسی ۳" (Chelsea 3) په نوم بېړۍ څخه اضطراري سګنال ترلاسه شو چې د مالټا بېرغ پرې پورته و او د بیالا ختیځ ته په ۱۸ سمندري میل فاصله کې موقعیت درلود.

د بېړۍ د عملې په وینا، دا اوکراینۍ بېړۍ چې په اودیسا کې راجستر شوې وه، د ۳ ډرونونو لخوا په پورتنۍ برخه او شاوخوا کې ویشتل شوې ده. د لومړي وزیر په وینا، د عملې ټول ۱۵ غړي (چې ۷ اوکراینیان او ۸ اذربایجانیان دي) په خوندي توګه د وارنا بندر ته لېږدول شوي او ۵ تنو طبي مرستې ترلاسه کړې دي.

رادېف وویل بلغاریا په ناټو او اروپايي ټولنه کې خپلو استازو ته خبر ورکړی او له نړیوالې ټولنې څخه د ډرون د اصل موندلو او د سمندري او هوایي څارنې پیاوړي کولو لپاره ملاتړ غواړي.

هغه وویل: «موږ تر اوسه پر سمدستي ډول داسې څرګند او نهایی شواهد نه لرو چې مسوولیت دواړو خواوو ته منسوب کړو،» او زیاته یې کړه چې هغه به په صوفیا کې د روسیې سفیر خبرو اترو ته وروبولي.

هغه دغه راز راپور ورکړ چې یوه بله بېړۍ د کراپېټس ختیځ په ۱۷ سمندري میل کې ویشتل شوې او وروسته ډوبه شوې ده، چې د عملې یوازې یو غړی یې ژغورل شوی دی.