د افغانستان کرکټ بورډ خبر ورکړی چې د هېواد د کرکټ پخوانی چټک توپ اچوونکی شاپور ځدراڼ، چې په نړۍوال ډګر کې یې د افغانستان د کرکټ په لومړنیو بریاوو او پرمختګ کې بنسټیز رول درلود، د سې شنبې په ورځ له اوږدې ناروغۍ وروسته ومړ.
شاپور ځدراڼ د خپلې ۳۹مې کلیزې له پوره کېدو یوه ورځ وړاندې د نوي ډیلي په یوه روغتون کې سا ورکړه. نوموړی په تېرو څو میاشتو کې هلته د وجود د دفاعي سیسټم (معافیت) د یوې نادره ناروغۍ تر درملنې لاندې و.
د افغانستان کرکټ بورډ په خپله اعلامیه کې ویلي: "په خورا زیات خپګان او درد سره، د افغانستان کرکټ بورډ د خپل پخواني چټک توپ اچوونکي شاپور ځدراڼ مړینه اعلانوي."
بورډ شاپور ځدراڼ د "افغان کرکټ یو له بنسټ اېښودونکو شخصیتونو" څخه وباله او زیاته یې کړه چې د هغه سرښندنې او ژمنتیا له ملي لوبډلې سره مرسته وکړه چې نړۍوال پړاو ته ورسېږي.
شاپور ځدراڼ چې په جګ قد او اوږدو وېښتانو مشهور چپ لاسی چټک توپ اچوونکی و، د ۲۰۰۹ او ۲۰۲۰ کلونو ترمنځ د افغانستان لپاره ۴۴ یو ورځنۍ او ۳۶ شل اوریزې نړۍوالې لوبې کړې وې. دا د افغانستان د کرکټ د چټکې ودې تر ټولو مهمه دوره وه.
ځدراڼ همدارنګه د ۲۰۱۰ او ۲۰۱۶ کلونو ترمنځ په څلورو شل اوریزو نړۍوالو جامونو کې برخه اخیستې وه او په ۹ لوبو کې یې ۹ وېکټې اخیستې وې.
کرکټ بورډ ویلي: "هغه یو له هغو ویاړلو لوبغاړو څخه و چې د افغان کرکټ د لومړني سفر په زړه کې و او د هغې لارې په جوړولو کې یې مرسته وکړه چې نن افغان کرکټ په نړۍواله کچه وځلېد."
