د کاناډا لومړي وزیر مارک کارني ویلي چې په البرټا ایالت کې د یوې "جدي پېښې" له امله په یوه پوځي اډه کې لویه اورلګېدنه رامنځته شوې، چې وروسته د دفاع وزیر لخوا هم پکې د مرګ ژوبلې پخلی وشو.
کارني د اېکس (X) په شبکه کې په یوه خپره کړې اعلامیه کې ویلي، دا پېښه د وینرایټ په نوم د کاناډايي ځواکونو په اډه کې رامنځته شوې، چې د اډمونټون ښار ختیځ ته شاوخوا ۲۱۰ کیلومتره لرې موقعیت لري.
د دفاع وزیر ډیویډ مک ګینټي د شنبې په ورځ ناوخته وویل چې دغې پېښې مرګ ژوبله اړولې ده.
مک ګینټي خبریالانو ته وویل: "په خواشینۍ سره باید ووایم چې په اډه کې د رامنځته شوې پېښې له امله کسانو ته مرګ ژوبله اوښتې ده."
د کاناډا د ملي دفاع وزارت یوې ویاندې وویل چې حکومت وضعیت له نږدې څاري او د نویو معلوماتو په ترلاسه کېدو سره به یې ژر تر ژره له رسنیو سره شریک کړي.
د وینرایټ ښاروالۍ وویل چې د ورځې په پیل کې اور د اډې د احاطې له کټارې اوښتی او یوې نږدې سیمې ته غځېدلی و، خو اوس په فعاله توګه کابو کېږي.
ښاروالۍ زیاته کړه چې د سیمې د تخلیې لپاره کوم امر نه دی صادر شوی.
د وینرایټ پوځي اډه د کاناډا د پوځ له تر ټولو فعالو او بوختو اډو څخه شمېرل کېږي.
