لاوروف په پلازمېنه مسکو کې د مسکو د نړیوالو اړیکو دولتي انسټیټیوټ (MGIMO) له استادانو او محصلینو سره وکتل.

لاوروف په دې ناسته کې د جرمني د هغې پرېکړې په اړه چې د روسیې کونسلګري یې تړلې، وویل: "دا د جرمنیانو له خوا اخیستل شوې یوه ناوړه پرېکړه ده. هغوی زموږ کونسلګري په داسې پلمو وتړله چې هیڅ بنسټ نه لري."

نوموړي د اوکراین کړکېچ ته په اشارې سره وویل: "په اوکراین کې نښتې باید په داسې ډول پای ته ورسېږي چې په اروپا کې نازېزم  ته هیڅ ځای پاتې نشي. که موږ اجازه ورکړو چې په اوکراین کې اوسنی رژیم په واک کې پاتې شي، نو موږ به له هغو کسانو سره خیانت کړی وي چې په ۱۹۴۵ کال کې یې نازېزم ته ماتې ورکړې وه."

لاوروف ټینګار وکړ چې له لوېدیځو هېوادونو سره اړیکو ته چمتو دي خو دا اړیکې به نور د پخوا په څېر نه وي. هغه زیاته کړه: "پر لوېدیځ به هیڅکله باور ونشي، ځکه هغوی په تېر او اوس کې موږ غولولي یو."

په ایران کې وضعیت:
لاوروف وویل چې امریکا او اسرائیل باید په منځني ختیځ کې د امنیت په اړه په مشورو کې شامل شي. هغه زیاته کړه: "د فارس خلیج په سیمه کې د امنیت په سیسټم کې د ایران شاملول به په سیمه کې د ثبات د تامین لپاره یو مهم ګام وي."

د روسیې د بهرنیو چارو وزیر همدارنګه یادونه وکړه چې په ایران کې د وضعیت له امله د "شمال-سویل" د ترانسپورتي دهلېز پروژې پلي کول ځنډېدلي دي، خو ویې ویل: "دا پروژه لا هم زموږ په پلانونو کې شامله ده او پلي به شي."