دا ودانۍ د ډهلي پوهنتون سوېلي ودانۍ  ته نږدې په "ستیا نیکیتن" سیمه کې، چې د محصلینو د استوګنې  ګڼ مرکزونه پکې دي، غرمه مهال ونړېده. له پېښې سمدستي وروسته د ژغورنې پراخ عملیات پیل شول.

د ډهلي ایالتي وزیرې "ریکھا ګوپتا" په اېکس (ټویټر) کې په یوه بیان کې ویلي: "د بېلابېلو ادارو ټیمونه د 'جګړې په کچه' چمتووالي سره د ژغورنې عملیات پر مخ وړي."

بېړنیو ټیمونو ۱۱ تنه له کنډوالو را ایستلي او ځايي روغتونونو ته یې لېږدولي دي.

چارواکو ویلي چې څلور کسان د هند د طبي علومو انسټیټیوټ (AIIMS) ټراما سنټر ته له رسېدو وروسته مړه شوي، او پنځم کس چې روغتیایي حالت یې نازک و، وروسته د سختو ټپونو له امله ساه ورکړه.

د روغتون چارواکو څرګنده کړې چې درې ناروغان لا هم تر درملنې لاندې دي، یو کس د بدن د غړو جراحي شوې او یو بل کس چې لږ ټپي و، له درملنې وروسته رخصت شوی دی.

پلټنې روانې دي:
د ډهلي پولیسو په وینا، دغه نړېدلې ودانۍ چې له ۴۰ تر ۵۰ کلونو پخوانۍ وه، یو تلک (بېسمینټ) او پنځه پوړونه یې درلودل. چارواکو تایید کړې چې د ودانۍ د نړېدو پر مهال په تلک کې د ترمیم چارې روانې وې.

پولیسو ویلي چې تر اوسه یې د "دازه لیلې" په نوم د دې استوګنځي د چلونکي "آنند بنسل" پر وړاندې لومړنی معلوماتي راپور  نه دی ثبت کړی.

د هند لومړي وزیر نریندر مودي د دې تراژیدۍ په اړه غمرازي ښودلې او دا پېښه یې "دردونکې" بللې ده. د مودي دفتر په اېکس کې لیکلي: "له هغو کسانو سره خواخوږي ښیم چې خپل عزیزان یې له لاسه ورکړي. د ټپیانو د ژر تر ژره روغتیا لپاره دعا کوم. چارواکي په سیمه کې بوخت دي او له ځپلو شویو سره مرسته کوي."

په سیمه کې د نورو ژوندي پاتې شویو کسانو د موندلو لپاره د لټون او ژغورنې عملیات لا هم دوام لري.