ډونالډ ټرمپ د اکتوبر په ۲۷مه په اسرائیلو کې د ترسره کېدونکو ټاکنو لپاره د اسرائیلو د لومړي وزیر بنیامین نتنیاهو څخه خپل ملاتړ اعلان کړی و.
د اسرائیلو لومړي وزیر بنیامین نتنیاهو د امریکا له ولسمشر ډونالډ ټرمپ سره په ټیلیفوني خبرو کې پر ایران د احتمالي نویو بریدونو په اشارې سره وویل: "موږ یو کار لرو چې باید بشپړ یې کړو."

نتنیاهو په ایکس (X) ټولنیزه شبکه کې په خپله پاڼه د امریکا له ولسمشر ټرمپ سره د ټیلیفوني خبرو ویډیو خپره کړه.

نتنیاهو له ټرمپ څخه مننه وکړه چې د اکتوبر په ۲۷مه په اسرائیلو کې په ترسره کېدونکو ټاکنو کې یې د ده ملاتړ کړی دی، او پر ایران احتمالي نویو بریدونو ته په اشارې سره یې وویل: "ډونالډ، (په ایران کې) موږ یو کار لرو چې باید بشپړ یې کړو. دا خبره تا هم کړې وه او موږ به دا کار په ګډه بشپړ کړو. دا به بل هیڅوک ونه کړي."

نتنیاهو د دې ادعا په کولو سره چې له امریکا سره د ګډ اقدام په پایله کې به نور ډېر هېوادونه د ابراهیم تړونونو سره یوځای شي چې له اسرائیلو سره د اړیکو عادي کول په کې شامل دي، وویل: "په امریکا کې خلک باید پوه شي چې ته د یوه اټومي ایران پر وړاندې، چې د دوی لپاره ترټولو ستر ګواښ دی، ودرېدې."

ټرمپ د دې په څرګندولو سره چې په ټاکنو کې د نتنیاهو د ملاتړ متن یې پخپله لیکلی، وویل: "ته یو جنګیالی یې. ستا سره  د خپل هېواد او احتمالاً د ځینو نورو لخوا درسره بې انصافي شوې ده... خو ته یو لوی جنګیالی یې او موږ به دا خبره ثابته کړو."

د امریکا ولسمشر ډونالډ ټرمپ د اکتوبر په ۲۷مه په اسرائیلو کې د ترسره کېدونکو ټاکنو لپاره د اسرائیلو د لومړي وزیر بنیامین نتنیاهو څخه خپل ملاتړ اعلان کړی و.

ټرمپ ایران ته په خطاب کې ویلي وو: "که دوی ژر تر ژره خپله لاره بدله نه کړي، موږ به ژر دا کار بشپړ کړو." هغه زیاته کړې وه چې که چېرې اسرائیل له نتنیاهو پرته بل کوم مشر وټاکي، نو که څه هم نیت یې نه وي، خو امریکا به مجبوره شي چې دا کار پخپله وکړي.