د امریکا ولسمشر ډونالډ ترامپ د فاکس (Fox) نیوز خبریال ټري ینګسټ (Trey Yingst) ته په مرکه کې ویلي، که چیرې ایران د امریکا غوښتنې ونه مني ، نو دا به یوازې د وخت خبره وي چې آیا دا ټول هېواد « هوا ته والوځول شي» او کله نه.
ډونالډ ترامپ زیاته کړه چې د شته انتخابونو په منځ کې د ایران بشپړ محوه کول، د اقتصادي پاشل کېدو په حال کې د هغه پرېښودل، او یا د یوه جامع تړون کول شامل دي.
دا څرګندونې وروسته له هغې کېږي چې د تهران حکومت خبرداری ورکړی و چې «که متحده ایالات یا په منځني ختیځ کې کوم بل هېواد تېروتنه وکړي، د د ډیرو سختو او غاښ ماتوونکي ځواب سره به مخ شي.»
بل خوا د امریکا د بهرنیو چارو وزارت په سیمه کې د مېشتو امریکایانو لپاره امنیتي خبرداری خپور کړی دی.
د ایران د سپاه پاسداران ځواکونو ویاند حسین محبي د خپل هېواد پر وړاندې د امریکا د احتمالي نویو بریدونو په اړه وویل: «که نوې حملی وشي، زموږ دفاعي او هجومي غبرګون به په جدي توګه بدل شي. که نوی برید وشي، موږ به د وسلو نوعیت او د جګړې جغرافیه بدله کړو.»
محبي په یوه ټلوېزیوني پروګرام کې د روان وضعیت په اړه دا څرګندونې وکړې.
نوموړي پر ایران د امریکا او اسرائیلو د نویو بریدونو د احتمال ارزونه وکړه او زیاته یې کړه:
«که نوې برید وشي، زموږ دفاع او بریدونه به له پخوا څخه بنسټیز توپیر ولري. د نوي برید په ځواب کې بې له شکه د وسلو او جګړې جغرافیه بدلوو. میدان ته به په نویو وړتیاوو سمبالې نوي وسلې راوباسو چې نړۍ بې له شکه حیرانه کړي. زموږ موخې به زړې موخې نوي؛ موږ نوي هدفونه ټاکلي چې تر اوسه پرې برید نه دی شوی.»
